December 27, 2022
December 27, 2022
ന്യൂസ്‌റൂം ബ്യുറോ
ദോഹ : ഖത്തറിൽ ഇന്നും മഴയ്ക്ക് സാധ്യതയുള്ളതിനാൽ വാഹനമോടിക്കുന്നവർ ജാഗ്രത പാലിക്കണമെന്ന് ഗതാഗത വിഭാഗം മുന്നറിയിപ്പ് നൽകി.മഴ മൂലമുള്ള ഗതാഗത തടസ്സങ്ങൾ നിരീക്ഷിക്കാനും ആവശ്യമായ നടപടികൾ സ്വീകരിക്കാനും പട്രോളിംഗ് വിഭാഗം 24 മണിക്കൂറും പ്രവർത്തിക്കുന്നുണ്ടെന്ന് ജനറൽ ട്രാഫിക് ഡിപ്പാർട്ട്‌മെന്റിലെ ട്രാഫിക് അവേർനെസ് ഡിപ്പാർട്ട്‌മെന്റ് അസിസ്റ്റന്റ് ഡയറക്ടർ ലെഫ്റ്റനന്റ് കേണൽ ജാബർ ഉദൈബ 'അൽ ശർഖ്' പത്രത്തോട് പറഞ്ഞു.
മഴയുള്ളപ്പോൾ വാഹന ഗതാഗതം സുഗമമാക്കുന്നതിനായി എല്ലാ പ്രധാന പാതകളിലും ഉൾവഴികളിലും പട്രോളിംഗ് ശക്തമാക്കിയിട്ടുണ്ട്.മഴയിൽ കാഴ്ച മങ്ങാനും വാഹനം തെന്നിമാറാൻ സാധ്യതയുണ്ടെന്നും ഡ്രൈവിങ്ങിലെ അശ്രദ്ധ മറ്റുള്ളവരെയും അപകടത്തിലാക്കുമെന്നും അദ്ദേഹം പറഞ്ഞു.റോഡിന്റെ അവസ്ഥ മനസിലാക്കി ജാഗ്രതയോടെ വാഹനമോടിക്കാനും വിൻഡ്‌ഷീൽഡ് വൈപ്പറുകൾ പ്രവർത്തിക്കുന്നുണ്ടെന്ന് ഉറപ്പുവരുത്തണമെന്നും അദ്ദേഹം നിർദേശിച്ചു.
അതേസമയം,രാജ്യത്ത് ഇന്നും മഴ ലഭിക്കാൻ സാധ്യതയുണ്ടെന്ന് കാലാവസ്ഥാ വിഭാഗം മുന്നറിയിപ്പ് നൽകിയിട്ടുണ്ട്.ഇന്നലെ രാജ്യത്തിന്റെ വിവിധ ഭാഗങ്ങളിൽ സാമാന്യം ഭേദപ്പെട്ട മഴ ലഭിച്ചിരുന്നു.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/B5cRGSkveuO5fUeQTErqlq എന്ന ലിങ്കിൽ ജോയിൻ ചെയ്യുക
