April 03, 2023
April 03, 2023
ന്യൂസ്റൂം ബ്യുറോ
ദോഹ :റമദാനിലെ പതിനാലാം രാവിൽ ആട്ടും പാട്ടും സമ്മാനങ്ങളുമായി പാരമ്പര്യത്തനിമയിൽ ഗരങ്കാവോ ആഘോഷിക്കാൻ തയാറെടുക്കുകയാണ് കുട്ടികൾ.കുട്ടികൾക്ക് സമ്മാനങ്ങൾ കൈമാറിയും മധുരപലഹാരങ്ങൾ വിതരണം ചെയ്തും ആഘോഷിക്കാറുള്ള കുട്ടികളുടെ ഗരങ്കാവോ ഇത്തവണ ഏപ്രിൽ 5ന് ബുധനാഴ്ചയാണ്.
കോവിഡ് കാല നിയന്ത്രണങ്ങൾക്ക് ശേഷം വീണ്ടും ആഘോഷങ്ങളുടെ രാത്രി വിരുന്നെത്തുമ്പോൾ സ്വദേശി വീടുകളും സൂഖുകൾ മുതൽ ഷോപ്പിങ് മാളുകൾ വരെയുള്ള വിപണികളും ആഘോഷത്തിമർപ്പിൽ കുട്ടികളെ വരവേൽക്കും. മിക്ക ഷോപ്പിങ് മാളുകളിലും തലേ ദിവസം വൈകിട്ട് മുതൽ തന്നെ കുട്ടികൾക്കായി മത്സരങ്ങളും സമ്മാനവിതരണവും ആരംഭിക്കും.
14-ാം രാത്രിയിൽ നോമ്പ് തുറന്ന ശേഷമാണ് പരമ്പരാഗത ആഘോഷങ്ങൾക്ക് തുടക്കമാവുക. നിറപ്പകിട്ടാർന്ന പൈതൃക വസ്ത്രങ്ങൾ അണിഞ്ഞ് ആട്ടവും പാട്ടുമായി കുട്ടികൾ ചെറു സംഘങ്ങളായി വീടുകൾ തോറും കയറിയിറങ്ങി സമ്മാനപ്പൊതികൾ സ്വീകരിക്കും. ആൺകുട്ടികൾ ഥൗബും തൊപ്പിയും ധരിച്ചും പെൺകുട്ടികൾ പരമ്പരാഗത വസ്ത്രമായ അൽസറിയും ശിരോവസ്ത്രമായ ബഖ്നലും ധരിച്ചുമാണ് ആഘോഷത്തിൽ പങ്കെടുക്കുന്നത്. പ്രത്യേകം തയാറാക്കിയ ഗരങ്കാവോ സഞ്ചികളും തോളിലുണ്ടാവും.
മധുരപലഹാരങ്ങൾ, ഉണങ്ങിയ പഴങ്ങൾ, കളിപ്പാട്ടങ്ങൾ തുടങ്ങി വ്യത്യസ്ത ഉൽപന്നങ്ങളാണ് വിപണിയിൽ പ്രധാനം. ചോക്ളേറ്റുകളും ഉണങ്ങിയ പഴങ്ങളും ചേർത്തുള്ള ഗരങ്കാവോ കിറ്റുകളും വിപണിയിലുണ്ട്. ഏകദേശം 100 റിയാൽ ആണ് ഈ കിറ്റുകളുടെ വില. സൂഖുകളിലെ വസ്ത്ര വിപണികളിൽ പെൺകുട്ടികൾക്കും ആൺകുട്ടികൾക്കുമുള്ള പരമ്പരാഗത വസ്ത്രങ്ങളും സുലഭമാണ്. പുനരുപയോഗ സാമഗ്രികൾ, തുണി തുടങ്ങിയവ കൊണ്ടു നിർമിച്ച മനോഹരമായ ഗരങ്കാവോ സഞ്ചികളും ലഭ്യമാണ്. കുട്ടികൾക്ക് സമ്മാനങ്ങൾ നിറച്ചു കൊടുക്കാനാണ് ഈ സഞ്ചി ഉപയോഗിക്കുക.
അൽ ഷഖബ് വില്ലേജിലെ ഗരങ്കാവോ ആഘോഷത്തിൽ കുടുംബങ്ങൾക്കും പങ്കെടുക്കാൻ അവസരമുണ്ട്. രാത്രി 8.30 മുതൽ അർധരാത്രി 12 വരെ നടക്കുന്ന ആഘോഷത്തിൽ പൊതുജനങ്ങൾക്കും പങ്കെടുക്കാം. ഏറ്റവും മികച്ച പരമ്പരാഗത ഗരങ്കാവോ വസ്ത്രമണിഞ്ഞെത്തുന്ന കുട്ടികൾക്ക് സമ്മാനവും നൽകും. ഫാഷൻ ഷോ, അലങ്കാര വിളക്കുകൾ ഉണ്ടാക്കുന്നതിനുള്ള ശിൽപശാല, പരമ്പരാഗത ഗെയിമുകൾ, സദു തുന്നൽ തുടങ്ങി മത്സരങ്ങളും പൈതൃക, സാംസ്കാരിക പരിപാടികളുമാണ് അൽ ഷഖബിൽ നടക്കുന്നത്. കുട്ടികൾക്ക് തങ്ങളുടേതായ ശൈലിയിൽ ഗരങ്കാവോ സഞ്ചികൾ അലങ്കരിക്കാനുള്ള അവസരവുമുണ്ട്. വ്യത്യസ്ത തരം സ്വീറ്റ്സുകൾ, ലഘുപലഹാരങ്ങൾ എന്നിവ വാങ്ങാനും രുചിക്കാനുമായി ദുഖാൻ അൽ ഫരീജ് സന്ദർശിക്കാം.
ന്യൂസ്റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക https://chat.whatsapp.com/KIGk615xlF1ILlMGxpUXqI