July 12, 2023
July 12, 2023
ന്യൂസ്റൂം ബ്യുറോ
ദോഹ :ആരോഗ്യ മേഖലയിലെ സേവനങ്ങൾക്ക് നാറാക്കോം ആപ്പും 107 ഹോട്ട്ലൈനും ഉപയോഗിക്കണമെന്ന് ഖത്തർ പ്രൈമറി ഹെൽത്ത് കെയർ കോർപ്പറേഷൻ (പിഎച്ച്സിസി)ആവശ്യപ്പെട്ടു.ഇതുവഴിയുള്ള സേവനങ്ങൾ പ്രോത്സാഹിപ്പിക്കുന്നതിനും കൂടുതൽ ജനകീയമാക്കുന്നതിനും , വിപുലമായ കാമ്പയിൻ ആരംഭിച്ചിട്ടുണ്ട്.രാജ്യത്തെ 31 ആരോഗ്യ കേന്ദ്രങ്ങളിൽ ലഭ്യമായ സൗകര്യങ്ങൾ എളുപ്പത്തിൽ ഉപഭോക്താക്കളിൽ എത്തിക്കാൻ ഇത് വഴി കഴിയും.
റീച്ചിങ് അവർ സർവീസ് ഈസിയർ നൗ( Reaching our Services Easier Now” എന്ന് പേരിട്ട PHCC കാമ്പയിന്റെ പ്രചാരണത്തിനായി സോഷ്യൽ മീഡിയ പ്ലാറ്റ്ഫോമുകൾ ഉൾപെടെയുള്ള സംവിധാനങ്ങൾ പ്രയോജനപ്പെടുത്തും.
ഫാമിലി മെഡിസിൻ, പുകവലി നിർത്തൽ, ഡെന്റൽ, മാനസികാരോഗ്യം, ഭക്ഷണക്രമം, നിയുക്ത ആരോഗ്യ കേന്ദ്രങ്ങളിൽ നേരത്തെയുള്ള സ്ക്രീനിംഗ് എന്നിവയുൾപ്പെടെയുള്ള സേവനങ്ങൾക്കായി രോഗികൾക്കോ അവരുടെ ആശ്രിതർക്കോ ആപ്പ് വഴി അപ്പോയിന്റ്മെന്റുകൾ എടുക്കുകയോ സമയം പുനഃക്രമീകരിക്കുകയോ ചെയ്യാം.
ഹെൽത്ത് കാർഡിന്റെ കാലാവധി കഴിയുന്ന തീയതി അറിയുന്നതോടൊപ്പം ഓൺലൈൻ വഴി പുതുക്കാനും നിശ്ചിത ആരോഗ്യ കേന്ദ്രങ്ങളിൽ ഫാമിലി ഫിസിഷ്യനെ കണ്ടെത്താനും ഇതുവഴി കഴിയും. രണ്ടു ഭാഷകളിലായി(ഇംഗ്ലീഷ് / അറബിക്)തികച്ചും ഉപയോക്തൃ-സൗഹൃദമായാണ് ആപ്പുകൾ സജ്ജീകരിച്ചിരിക്കുന്നത്. ആവശ്യമുള്ളപ്പോൾ ഹെൽത്ത് സെന്റർ മാറ്റാനും രജിസ്റ്റർ ചെയ്ത ഹെൽത്ത് സെന്ററിൽ ഫാമിലി ഫിസിഷ്യൻമാരുടെ അപ്പോയിന്മെന്റ് മാറ്റാനും ഇതുവഴി സാധിക്കും.
എല്ലാ സ്മാർട്ട്ഫോണുകളിലും ആപ്ലിക്കേഷൻ ഡൌൺലോഡ് ചെയ്യാവുന്നതാണ്. നാഷണൽ ഓതന്റിക്കേഷൻ സിസ്റ്റത്തിൽ (തൗതീഖ്) അക്കൗണ്ട് ഉണ്ടായിരിക്കണം. ക്യുഐഡി ഉള്ളവർക്കും 18 വയസ്സിന് മുകളിലുള്ളവർക്കും സേവനം ഉപയോഗപ്പെടുത്താൻ കഴിയും.
എല്ലാ ആരോഗ്യ കേന്ദ്രങ്ങൾക്കുമായി PHCC യുടെ ഏകീകൃത ‘ഹയാക്ക് 107’ സന്ദർശകർക്ക് വിവരങ്ങൾ സ്വീകരിക്കുന്നതിനും അപ്പോയിന്റ്മെന്റുകൾ ഷെഡ്യൂൾ ചെയ്യുന്നതിനും എളുപ്പമാക്കുന്നു. അഞ്ച് ഭാഷകളിൽ സേവനം ലഭ്യമാണ്. കൃത്യമായ വിവരങ്ങൾ നൽകാനും ഉചിതമായ മെഡിക്കൽ പരിചരണം നൽകാനും പ്രാവീണ്യമുള്ള ആരോഗ്യ പ്രവർത്തകരാണ് ഹോട്ട്ലൈനിൽ കാര്യങ്ങൾ നിയന്ത്രിക്കുന്നത്.
ന്യൂസ്റൂം വാർത്തകളും തൊഴിൽ സംബന്ധമായ അറിയിപ്പുകളും മുടങ്ങാതെ ലഭിക്കാൻ ഇതുവരെ ന്യൂസ്റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക https://chat.whatsapp.com/FZrPbBIed7U4lm5VsQzYgH