November 02, 2022
November 02, 2022
ന്യൂസ്റൂം ബ്യുറോ
ദോഹ : ഖത്തർ ഫിഫ ലോകകപ്പുമായി ബന്ധപ്പെട്ട ചിഹ്നങ്ങളോ മറ്റ് ഔദ്യോഗിക പ്രതീകങ്ങളോ അനുമതിയില്ലാതെ നിർമിക്കുന്നതും വിൽപന നടത്തുന്നതും ഫിഫ ലോകകപ്പ് ആതിഥ്യത്വ നടപടികളുമായി ബന്ധപ്പെട്ട 2021 ലെ 10-ാം നമ്പർ നിയമത്തിന്റെ ചട്ട ലംഘനമാണെന്ന് ആഭ്യന്തര മന്ത്രാലയം വ്യക്തമാക്കി. ഇത്തരത്തിൽ ഖത്തറിൽ വിൽപനക്കായി വെച്ച 144 വ്യാജ ഫിഫ ലോകകപ്പ് ട്രോഫികൾ പിടിച്ചെടുത്തതായും മന്ത്രാലയം അറിയിച്ചു.
ഇന്റലക്ച്വൽ പ്രോപ്പർട്ടി പ്രൊട്ടക്ഷൻ കമ്മിറ്റിയുടെ സഹകരണത്തോടെ ജനറൽ ഡയറക്ടറേറ്റ് ഓഫ് ക്രിമിനൽ ഇൻവെസ്റ്റിഗേഷനിലെ സാമ്പത്തിക, സൈബർ കുറ്റകൃത്യ പ്രതിരോധ വിഭാഗം നടത്തിയ അന്വേഷണത്തിലാണ് വ്യാജ ട്രോഫികൾ കണ്ടെത്തിയത്..
വ്യാജ ഫിഫ ലോകകപ്പ് ട്രോഫികൾ വിൽക്കുന്ന ഒരു വെബ്സൈറ്റിനെക്കുറിച്ച് വിവരം ലഭിച്ചതിനെ തുടർന്ന് നടത്തിയ അന്വേഷണത്തിലാണ് പ്രതികളെ പിടികൂടിയത്.ഫെഡറേഷൻ ഇന്റർനാഷണൽ ഫുട്ബോൾ അസോസിയേഷനിൽ (ഫിഫ) നിന്ന് മുൻകൂർ രേഖാമൂലമുള്ള സമ്മതം വാങ്ങാതെ, ഫിഫ ലോകകപ്പ് ഖത്തറുമായി ബന്ധപ്പെട്ട ബൗദ്ധിക സ്വത്തവകാശത്തിന്റെ പരിധിയിൽ വരുന്ന നിയമലംഘനങ്ങൾക്കെതിരെ നിരവധി ബോധവൽക്കരണ സന്ദേശങ്ങൾ പ്രസിദ്ധീകരിക്കുന്നുണ്ട്.
ബൗദ്ധിക സ്വത്തിനെ നിയന്ത്രിക്കുന്ന നിയമങ്ങളും ചട്ടങ്ങളും പാലിക്കണമെന്നും മറ്റുള്ളവരുടെ അവകാശങ്ങൾ ലംഘിക്കരുതെന്നും അധികൃതർ ആവശ്യപ്പെട്ടു.
ന്യൂസ്റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/EbsrZk47eaBENKOhwtWeGf എന്ന ലിങ്കിൽ ജോയിൻ ചെയ്യുക