January 03, 2024
January 03, 2024
ദോഹ: ഖത്തറിൽ മാലിന്യ ശേഖരണവും സംസ്‌കരണ സംവിധാനവും മെച്ചപ്പെടുത്തുന്നതിന് 7,000 കണ്ടെയ്‌നറുകളിലും 1,000 വാഹനങ്ങളിലും ട്രാക്കിംഗ് ഉപകരണങ്ങൾ സ്ഥാപിച്ചതായി മുനിസിപ്പാലിറ്റി മന്ത്രാലയം അറിയിച്ചു.
കണ്ടെയ്‌നറുകൾ, ക്ലീനിംഗ് വാഹനങ്ങൾ, മെഷീനുകൾ, ഉപകരണങ്ങൾ എന്നിവ ട്രാക്ക് ചെയ്യുന്നതിനുള്ള പദ്ധതിയുടെ ഭാഗമാണിതെന്നും പദ്ധതിയുടെ 90 ശതമാനത്തോളം പൂർത്തിയായിട്ടുണ്ടെന്നും മുനിസിപ്പാലിറ്റി മന്ത്രാലയത്തിലെ പ്രോജക്ട് ആൻഡ് ഡെവലപ്‌മെന്റ് വകുപ്പ് ഡയറക്ടർ സുലൈമാൻ അൽ അബ്ദുല്ല പറഞ്ഞു.
മാലിന്യത്തിന്റെ അളവ്, മാലിന്യത്തിന്റെ അവസാന ശേഖരണം എന്നിവ സംബന്ധിച്ച വിവരങ്ങൾ മാലിന്യ കണ്ടെയ്നറുകളിലെ സെൻസറുകൾ ഉപയോഗിച്ച് ഡാറ്റാ മാനേജ്‌മെന്റ് സിസ്റ്റത്തിലേക്ക് അയക്കും. മുനിസിപ്പാലിറ്റി മന്ത്രിയുടെ നേതൃത്വത്തിൽ ഡിജിറ്റൽ ട്രാൻസ്‌ഫോർമേഷൻ ആൻഡ് ഇൻസ്റ്റിറ്റ്യൂഷണൽ എക്‌സലൻസ് കമ്മിറ്റി രൂപീകരിച്ച് ഡിജിറ്റൽ പരിവർത്തനത്തിന് വലിയ പ്രാധാന്യമാണ് മന്ത്രാലയം നൽകുന്നതെന്ന് അൽ അബ്ദുല്ല പറഞ്ഞു. പൊതുജനങ്ങൾക്കും എല്ലാ മേഖലകളിലെയും ഗുണഭോക്താക്കൾക്കും ക്രിയാത്മകമായ സ്‌മാർട്ട് സെൽഫ് സർവീസുകൾ നൽകുന്നതിനായി ഡിജിറ്റൽ പരിവർത്തനത്തിലൂടെ 400ഓളം സേവനങ്ങൾ വികസിപ്പിക്കുക എന്നതാണ് മന്ത്രാലയത്തിന്റെ മറ്റൊരു പ്രധാന പദ്ധതി. 400 സർവീസുകളിൽ 65 എണ്ണം പൂർത്തിയായിട്ടുണ്ടെന്നും, ബാക്കിയുള്ള സർവീസുകൾ 2024-ൽ പൂർത്തീകരിക്കുമെന്ന് പ്രതീക്ഷിക്കുന്നുവെന്നും അദ്ദേഹം കൂട്ടിച്ചേർത്തു.
അതേസമയം, ഖത്തറിൽ പുനരുപയോഗിക്കാവുന്ന വസ്തുക്കളും ജൈവ മാലിന്യങ്ങളും വേർതിരിക്കുന്ന കണ്ടെയ്‌നറുകളും മുനിസിപ്പാലിറ്റി മന്ത്രാലയം വിതരണം ചെയ്തിരുന്നു. ചാര നിറത്തിലുള്ള കണ്ടെയ്നറുകളിൽ ഗ്ലാസ്, പ്ലാസ്റ്റിക്, പേപ്പറുകൾ, മെറ്റലുകൾ തുടങ്ങിയ പുനരുപയോഗം ചെയ്യാവുന്ന വസ്തുക്കളും, നീല നിറത്തിലുള്ള കണ്ടെയ്നറുകളിൽ ഭക്ഷ്യ മാലിന്യങ്ങളും ശുചീകരണ സാമഗ്രികളും എന്നിങ്ങനെയാണ് വേർതിരിക്കേണ്ടത്. ഖത്തർ നാഷണൽ വിഷൻ 2030യുടെ ഭാഗമായാണ് പദ്ധതി.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/CIEQF0ymerI3E7Kl0Fortt
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F
