September 06, 2023
September 06, 2023
ദോഹ: ഖത്തറിൽ വേനൽക്കാലത്ത് പൊതുവെ, ജനങ്ങളിൽ മൈഗ്രെയ്ൻ കാരണമുള്ള ബുദ്ധിമുട്ടുകൾ വർധിക്കുന്നതായി റിപ്പോർട്ട്. ശ്വാസകോശത്തിൽ വായു കുടുങ്ങുന്നത് കാരണം (എയർ ട്രാപ്പിംഗ്) തലച്ചോറിലുണ്ടാകുന്ന പ്രശ്നങ്ങൾ, ആവശ്യത്തിനുള്ള വെള്ളം കുടിക്കാതിരിക്കുക, കൂടുതൽ വെളിച്ചം തട്ടുക തുടങ്ങിയ കാരണങ്ങളും മൈഗ്രെയ്ൻ വർധിപ്പിക്കുമെന്ന് പ്രൈമറി ഹെൽത്ത് കെയർ കോർപ്പറേഷൻ (പിഎച്ച്സിസി) വ്യക്തമാക്കി.
മൈഗ്രേയ്നിനെ തടയാൻ ദീർഘനേരം സൂര്യപ്രകാശം ഏൽക്കുന്നത് ഒഴിവാക്കണമെന്നും, പുറത്തിറങ്ങുമ്പോൾ സൺഗ്ലാസ് ഉപയോഗിക്കണമെന്നും, ആരോഗ്യകരമായ ഭക്ഷണക്രമം പിന്തുടരണമെന്നും, ലളിതമായ വ്യായാമങ്ങൾ ചെയ്യണമെന്നും പിഎച്ച്സിസി നിർദേശിച്ചു. കടുത്ത ചൂട്, കടുത്ത തണുപ്പ്, ഉയർന്ന ഈർപ്പം, വരണ്ട വായു, ശക്തമായ കാറ്റ് എന്നിവയും മൈഗ്രൈനിന് കാരണമാകുന്നതാണ്. തലയുടെ ഒരു വശത്ത് വേദന, ഛർദ്ദി എന്നിവയുണ്ടെങ്കിൽ അത് കാലാവസ്ഥാ കാരണമുള്ള മൈഗ്രെയിനുകളാകാമെന്ന് അധികൃതർ സൂചിപ്പിച്ചു. തലവേദനയ്ക്കൊപ്പം ഉയർന്ന രക്തസമ്മർദ്ദം, പല്ല് വേദന, സൈനസൈറ്റിസ്, ചെവി വേദന, ചെവിയിലെ അണുബാധ എന്നിവ പോലുള്ള മറ്റ് ലക്ഷണങ്ങളോടൊപ്പവും മൈഗ്രേയ്ൻ ഉണ്ടാകാം.
മൈഗ്രേനിന്റെ ലക്ഷണമുള്ളപ്പോൾ ഇരുണ്ടതും ശാന്തവുമായ മുറിയിൽ ഇരിക്കുക, ആവശ്യത്തിന് വെള്ളം കുടിക്കുക, മരുന്നുകൾ കഴിക്കുക, ആവശ്യത്തിന് ഉറങ്ങുക തുടങ്ങിയവയാണ് പരിഹാരങ്ങൾ.
ന്യൂസ്റൂം വാർത്തകളും തൊഴിൽ സംബന്ധമായ അറിയിപ്പുകളും മുടങ്ങാതെ ലഭിക്കാൻ ഇതുവരെ ന്യൂസ്റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക- https://chat.whatsapp.com/7iFkiXrjqZbE8gsI6yASj9