January 18, 2024
January 18, 2024
ദോഹ: എ.എഫ്.സി ഏഷ്യൻ കപ്പിൽ ഇന്ത്യക്ക് ഇന്ന് രണ്ടാം പോരാട്ടം. ടീമിനോടുള്ള ആരാധക പിന്തുണക്ക് അഭിനന്ദനവും നന്ദിയുമറിയിച്ച് പരിശീലകൻ ഇഗോർ സ്റ്റിമാക്. കേരളത്തിൽ നിന്നുള്ള ഫുട്ബാൾ ആരാധകരുടെ പിന്തുണയെയും സ്റ്റിമാക് എടുത്തുപറഞ്ഞു. ഉസ്ബകിസ്താനെതിരായ മത്സരത്തിന് മുമ്പായി നടന്ന വാർത്തസമ്മേളനത്തിൽ സംസാരിക്കുകയായിരുന്നു അദ്ദേഹം.
‘കുവൈത്തിൽ നടന്ന ലോകകപ്പ് യോഗ്യതമത്സരത്തിൽ ഗാലറിയിൽ ഇന്ത്യക്ക് പിന്തുണയുമായി വലിയ ആരാധകരെത്തിയിരുന്നു. ആ മത്സരം ജയിക്കാൻ ഗാലറിയിലെ ആരാധക പങ്കാളിത്തവും കാരണമായി. എതിരാളികൾക്കെതിരെ ആവേശത്തോടെ കളിക്കാൻ കളിയുടെ മുഴുവൻ സമയവും ആരാധകർ നൽകിയ പിന്തുണ ഊർജമായി.
ആ പിന്തുണ ഖത്തറിലുമുണ്ട്. കേരളത്തിൽ നിന്നുള്ള വലിയൊരു വിഭാഗം ആരാധകർ ഇവിടെയുണ്ട്. അവരുടെ ഫുട്ബാൾ ആവേശം ശ്രദ്ധേയമാണ്. ഈ പിന്തുണ ഉസ്ബകിസ്താനെതിരായ മത്സരത്തിലും പ്രതീക്ഷിക്കുന്നു. കാണികൾക്ക് ഏറ്റവും മികച്ച സമയം കൂടിയാണ് ഇന്നത്തെ കളി. കൂടുതൽ പേരെ സ്റ്റേഡിയത്തിൽ പ്രതീക്ഷിക്കുന്നു’ - സ്റ്റിമാക് പറഞ്ഞു.
കാണികളുടെ വർധിച്ച സാന്നിധ്യം കളിക്കാർക്ക് ആത്മവിശ്വാസവും കരുത്തും പകരുമെന്ന് ഇന്ത്യൻ ഗോൾകീപ്പർ അമരീന്ദർ സിങ്ങും പറഞ്ഞു.
ഇന്ന് (വ്യാഴാഴ്ച) അഹ്മദ് ബിൻ അലി സ്റ്റേഡിയത്തിൽ വൈകുന്നേരം 5.30നാണ് ഉസ്ബകിസ്താനെതിരായ മത്സരം. കൂടാതെ, ജാസിം ബിൻ ഹമദ് സ്റ്റേഡിയത്തിൽ ഉച്ചക്ക് 2:30ന് ഓസ്‌ട്രേലിയക്കെതിരെ സിറിയയും, അൽ ജനൂബ് സ്റ്റേഡിയത്തിൽ രാത്രി 8:30ന് ഫലസ്തീനെതിരെ യു.എ.ഇയും മത്സരിക്കും.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/KIGk615xlF1ILlMGxpUXqI
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F
