April 02, 2024
April 02, 2024
ദോഹ: ഖത്തര് എച്ച്എംസി കാന്സര് രോഗികള്ക്കായി ഹോം ട്രീറ്റ്മെന്റ് സേവനം ആരംഭിച്ചു. ഹമദ് മെഡിക്കല് കോര്പ്പറേഷന്റെ (എച്ച്എംസി) നാഷണല് സെന്റര് ഫോര് കാന്സര് കെയര് ആന്റ് റിസര്ച്ചിന്റെ (എൻ.സി.സി.സി.ആർ) നേതൃത്വത്തില് പ്രോസ്റ്റേറ്റ്, സ്തനാര്ബുദം എന്നിവ ബാധിച്ച ഖത്തറി രോഗികള്ക്കാണ് പുതിയ ചികിത്സാ സേവനം ആരംഭിച്ചത്. പരിശീലനം ലഭിച്ച നഴ്സിംഗ് ടീം ചികിത്സാ പ്ലാന് അനുസരിച്ച് നിശ്ചിത തീയതികളില് രോഗികള്ക്ക് വീട്ടിലെത്തി നിര്ദേശിച്ചിട്ടുള്ള കീമോതെറാപ്പി കുത്തിവെയ്പ്പുകള് നല്കുന്നതാണ് പുതിയ സേവനം. എല്ലാ ശനിയാഴ്ചകളിലുമാണ് ഹോം ട്രീറ്റ്മെൻ്റ് സേവനം നൽകുന്നത്.
2023-2026ലെ ഖത്തർ കാൻസർ പ്ലാനിന്റെ (QCP) ഭാഗമായി റമദാനിൻ്റെ തുടക്കത്തിലാണ് പുതിയ സേവനം ആരംഭിച്ചതെന്ന് ഖത്തർ വാർത്താ ഏജൻസിയോട് (ക്യുഎൻഎ) എൻസിസിസിആർ സിഇഒയും മെഡിക്കൽ ഡയറക്ടറും എച്ച്എംസിയിലെ കോർപ്പറേറ്റ് കാൻസർ സർവീസസ് ചെയർമാനുമായ ഡോ. മുഹമ്മദ് സലേം അൽ ഹസൻ പറഞ്ഞു.
കിടപ്പിലായ രോഗികൾ, 65 വയസ്സിന് മുകളിൽ പ്രായമുള്ള രോഗികൾ, അല്ലെങ്കിൽ ചികിത്സ ലഭിക്കാൻ ആശുപത്രിയിൽ എത്താൻ കഴിയാത്ത രോഗികൾ എന്നിവർക്ക് ഹോം ട്രീറ്റ്മെന്റ് സേവനം ലഭ്യമാക്കുമെന്ന് ഡോ. അൽ ഹസ്സൻ വ്യക്തമാക്കി. അത്തരം രോഗികൾക്ക് വീട്ടിൽ ചികിത്സയും പരിചരണവും നൽകും.
ഖത്തറിലെ എല്ലാ കാൻസർ രോഗികളെയും ചികിത്സിക്കാൻ ലക്ഷ്യമിടുന്ന ഖത്തർ കാൻസർ പദ്ധതിയുടെ ഭാഗമായാണ് കാൻസർ രോഗികൾക്കുള്ള ഹോം ട്രീറ്റ്മെന്റ് ലഭ്യമാക്കുന്നതെന്ന് ഡോ. അൽ ഹസൻ കൂട്ടിച്ചേർത്തു. എല്ലാ കാൻസർ രോഗികൾക്കും ദിവസവും ഹോം ട്രീറ്റ്മെന്റ് നൽകാനും, മറ്റ് തരത്തിലുള്ള ക്യാൻസറുകൾ പദ്ധതിയിൽ ഉൾപ്പെടുത്താനും എൻസിസിസിആർ ശ്രമിക്കുന്നുണ്ടെന്നും അദ്ദേഹം വ്യക്തമാക്കി. പ്രായമായ കാൻസർ രോഗികൾക്കായി കഴിഞ്ഞ വർഷം പാലിയേറ്റീവ് ഹോംകെയർ സേവനം ആരംഭിച്ചിരുന്നു.
ന്യൂസ്റൂം വാര്ത്തകളും തൊഴില് സംബന്ധമായ അറിയിപ്പുകളും മുടങ്ങാതെ ലഭിക്കാന് ഇതുവരെ ന്യൂസ്റൂം ഗ്രൂപ്പുകളില് അംഗങ്ങളല്ലാത്തവര് മാത്രം ജോയിന് ചെയ്യുക- https://chat.whatsapp.com/IocT7PQnr4MEYpMCPpqwIn
ന്യൂസ്റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F