September 06, 2023
September 06, 2023
ദോഹ: ഖത്തറിൽ എനർജി ഡ്രിങ്കുകൾ കുട്ടികളുടെയും കൗമാരക്കാരുടെയും ആരോഗ്യത്തിന് ദോഷഫലങ്ങളുണ്ടാക്കുമെന്ന് ഹമദ് മെഡിക്കൽ കോർപ്പറേഷൻ (എച്ച്എംസി) മുന്നറിയിപ്പ് നൽകി.
എനർജി ഡ്രിങ്കുകളുടെ അഞ്ച് പ്രധാന ദോഷങ്ങളെ കുറിച്ച് സോഷ്യൽ മീഡിയ കാമ്പെയ്നിലൂടെ എച്ച്എംസി വെളിപ്പെടുത്തി. കുട്ടികളും കൗമാരക്കാരും എനർജി ഡ്രിങ്കുകൾ കഴിക്കുന്നതിൽ നിന്ന് വിട്ടുനിൽക്കണമെന്നും അധികൃതർ നിർദേശിച്ചു. ഇത്തരം ഡ്രിങ്കുകൾ ഹൃദയത്തിന്റെ പ്രവർത്തനങ്ങളിൽ മാറ്റം വരുത്തുമെന്നും, ഹൃദയത്തിന്റെയും രക്ത ധമനികളുടെയും രോഗങ്ങൾക്കുള്ള സാധ്യത വർദ്ധിപ്പിക്കുമെന്നും എച്ച്എംസി വ്യക്തമാക്കി.
കുട്ടികളും കൗമാരക്കാരും എനർജി ഡ്രിങ്കുകൾ ഉപയോഗിക്കുന്നത് നാഡീവ്യവസ്ഥയുടെ തകരാറുകൾ, ഉറക്കമില്ലായ്മ, സമ്മർദ്ദം, ഉത്കണ്ഠ എന്നിവയ്ക്ക് കാരണമാകുന്നതായാണ് റിപ്പോർട്ട്. കൂടാതെ, അമിതവണ്ണത്തിനുള്ള സാധ്യത വർദ്ധിപ്പിക്കുന്നതോടൊപ്പം ഇൻസുലിൻ പ്രതിരോധം മുൻകൂട്ടി ആരംഭിക്കുന്നതിനും, ഉയർന്ന ആസിഡിന്റെ അംശങ്ങളുള്ളതിനാൽ പല്ലുകൾക്ക് ഗുരുതരമായ കേടുപാടുകൾ വരുത്തുന്നതിനും ഇതിടയാക്കും. എനർജി ഡ്രിങ്കുകൾ ഓർമ്മക്കുറവിനും ശ്രദ്ധക്കുറവിനും കാരണമാകുമെന്നും എച്ച്എംസി കൂട്ടിച്ചേർത്തു.
അതേസമയം, ഖത്തറിൽ എനർജി ഡ്രിങ്കുകളുടെ ഉപഭോഗം നിയന്ത്രിക്കാൻ അധികാരികൾ നിരവധി നടപടികൾ സ്വീകരിച്ചിട്ടുണ്ട്. 2016 മുതൽ പാക്കേജുകളിൽ നിയമപ്രകാരമുള്ള മുന്നറിയിപ്പ് ലേബലുകൾ പ്രദർശിപ്പിക്കാതെ വിപണിയിൽ എനർജി ഡ്രിങ്ക് വിൽക്കുന്നത് സാമ്പത്തിക വാണിജ്യ മന്ത്രാലയം നിരോധിച്ചിട്ടുണ്ട്. വെള്ള പശ്ചാത്തലത്തിൽ ഇംഗ്ലീഷിലും അറബിയിലും ജാഗ്രതാ ലേബലുകൾ വ്യക്തമായി പ്രദർശിപ്പിക്കണമെന്നാണ് നിയമം.
ന്യൂസ്റൂം വാർത്തകളും തൊഴിൽ സംബന്ധമായ അറിയിപ്പുകളും മുടങ്ങാതെ ലഭിക്കാൻ ഇതുവരെ ന്യൂസ്റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക- https://chat.whatsapp.com/7iFkiXrjqZbE8gsI6yASj9