November 24, 2022
November 24, 2022
ന്യൂസ്‌റൂം ബ്യുറോ
ദോഹ : ഖത്തർ ദേശീയ ദിനാഘോഷങ്ങൾക്ക് നാളെ തുടക്കമാവും."ഐക്യമാണ് നമ്മുടെ ശക്തിയുടെ ഉറവിടം” എന്ന മുദ്രാവാക്യത്തെ അടിസ്ഥാനമാക്കിയാണ് ഇത്തവണത്തെ ദേശീയ ദിനാഘോഷങ്ങൾക്ക് അരങ്ങുണരുക.
24 ദിവസം നീണ്ടുനിൽക്കുന്ന പരിപാടിയിൽ ഖത്തറി സംസ്‌കാരവും പൈതൃകവും ദേശീയ സ്വത്വവും പ്രതിഫലിപ്പിക്കുന്ന സെമിനാറുകൾ, കവിതാ സായാഹ്നങ്ങൾ, നാടകാവതരണങ്ങൾ, ദൃശ്യകലകൾ സാംസ്കാരിക, പൈതൃക, കലാ പ്രവർത്തനങ്ങൾ എന്നിവ നടക്കും.
ലോകകപ്പ് നടക്കുന്നതിനാൽ അൽ സദ്ദിലെ പതിവ് കേന്ദ്രത്തിന് പകരം ഉംസലാൽ മുഹമ്മദിലെ വിപുലീകരിച്ച ദർബ് അൽ സായി മൈതാനിയിലാണ് ഇത്തവണ ആഘോഷങ്ങൾ നടക്കുക.രാജ്യത്തിന്റെ സാംസ്കാരിക പൈതൃകം വെളിവാക്കുന്ന 4,500 ഓളം സാംസ്കാരിക പരിപാടികളാണ് ഇത്തവണ ഉൾപ്പെടുത്തിയിട്ടുള്ളത്. നവംബർ 25 മുതൽ ഡിസംബർ 18 വരെ 24 സെമിനാറുകൾ, ആറ് കവിയരങ്ങുകൾ, ഒമ്പത് നാടക പ്രദർശനങ്ങൾ എന്നിവയുൾപ്പെടെ 96-ലധികം ദൈനംദിന സാംസ്കാരിക-കലാ പരിപാടികൾ വേദിയിൽ അരങ്ങേറും.
തിയേറ്റർ അഫയേഴ്സ് സെന്റർ, മ്യൂസിക് അഫയേഴ്സ് സെന്റർ, വിഷ്വൽ ആർട്ട് സെന്റർ, ഖത്തർ പോയട്രി സെന്റർ “ദിവാൻ അൽ അറബ്”, ഖത്തർ മീഡിയ സെന്റർ, ഖത്തർ ഫോറം ഫോർ ഓതേഴ്സ്, ഖത്തർ ഫോട്ടോഗ്രാഫി സെന്റർ, മന്ത്രാലയവുമായി ബന്ധപ്പെട്ട മറ്റ് കേന്ദ്രങ്ങൾ എന്നിവ പരിപാടിയിൽ പങ്കെടുക്കും.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/FIrAwQZT29aGSsExw8Oea6 എന്ന ലിങ്കിൽ ജോയിൻ ചെയ്യുക
