November 05, 2022
November 05, 2022
ന്യൂസ്‌റൂം ബ്യുറോ
ദോഹ :ഖത്തർ ലോകകപ്പിന് ആവേശം പകരാൻ സംഗീത ആൽബങ്ങളിൽ വ്യത്യസ്തമായ അഭിരുചികളുമായി മലയാളികൾ.തികഞ്ഞ പ്രൊഫഷണൽ തികവോടെയുള്ളതും അല്ലാത്തതുമായ ഒരു ഡസനിലധികം സംഗീത ആൽബങ്ങളാണ് ഖത്തർ മലയാളികൾ ഇതുവരെ ലോകകപ്പിനെ അടിസ്ഥാനമാക്കി പുറത്തിറക്കിയത്.
ദീർഘകാലം ഖത്തറിൽ പ്രവാസിയായിരുന്ന സിറാജ് റെസ അറബിക്,ഇംഗ്ലീഷ് രസക്കൂട്ടിൽ തയാറാക്കിയ 'ഹല,ഹല'യാണ് ഇപ്പോൾ യൂട്യൂബിൽ ശ്രദ്ധ നേടുന്നത്. നേരത്തെ നിരവധി ആൽബങ്ങളും ഷോർട്ട് ഫിലിമുകളും ചെയ്ത് ഖത്തർ മലയാളികൾക്ക് സുപരിചിതനായ സിറാജ് റെസ 2018 ൽ ഖത്തർ ദേശീയ ദിനത്തോടനുബന്ധിച്ച് തയാറാക്കിയ "ലുലുൽ യാ ഖത്തർ "ആൽബവും പ്രേക്ഷക ശ്രദ്ധ നേടിയിരുന്നു.
സിറാജ് തന്നെ സംഗീതം നൽകിയ ആൽബത്തിൽ സിനിമ പിന്നണി ഗായകനും, സൂഫി ഗായകനുമായ സിയാഉൽ ഹഖാണ് അറബിയിൽ ശബ്ദം നൽകിയിരിക്കുന്നത്.നിരവധി മലയാള സാഹിത്യ കൃതികൾ അറബിയിലേക്ക് വിവർത്തനം ചെയ്ത് ശ്രദ്ധ നേടിയ സുഹൈൽ അബ്ദുൽഹഖീം വാഫിയാണ് രചന.
ശ്യാംലാലിന്റെ ശബ്ദത്തിലുള്ള ഇംഗ്ലീഷ് റാപ്പിന് വരികൾ എഴുതിയത് പി.യു.ലക്ഷ്മി.സിറാജ് റെസ തന്നെ മുഖ്യ വേഷത്തിൽ അഭിനയിച്ച ആൽബത്തിൽ നിരവധി കലാകാരന്മാരും കലാകാരികളും അഭിനയിച്ചിട്ടുണ്ട്.
20 വർഷക്കാലം ഖത്തറിൽ പ്രവാസിയായിരുന്നെങ്കിലും കോവിഡിനെ തുടർന്ന് തിരിച്ചുവരാൻ കഴിയാത്തതിനാൽ നാട്ടിൽ തുടരുന്ന സിറാജ് ഖത്തറിനോടുള്ള ഐക്യദാർഢ്യവും സ്നേഹവും പ്രകടിപ്പിക്കാനാണ് ഇത്തരമൊരു ആൽബം തയ്യാറാക്കിയതെന്ന് ന്യൂസ്‌റൂമിനോട് പറഞ്ഞു.
പവൻ ഹ്രൂപ്പ് നിർമിച്ച ആൽബം സംവിധാനം ചെയ്തതും സിറാജ് തന്നെയാണ്.ആലുവ സ്വദേശിയാണ്.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/EbsrZk47eaBENKOhwtWeGf എന്ന ലിങ്കിൽ ജോയിൻ ചെയ്യുക
