July 08, 2021
July 08, 2021
ദോഹ: ബലി പെരുന്നാള്‍ ആഘോഷങ്ങളുമായി ബന്ധപ്പെട്ട് ജി.സി.സി രാജ്യങ്ങളില്‍ നിന്നുള്ള നിരവധി സന്ദര്‍ശകര്‍ ഖത്തറിലെത്തുമെന്ന് പ്രതീക്ഷിക്കുന്നതായി വിലയിരുത്തല്‍. ഖത്തറിലെ പുതിയ സാഹചര്യവും സുരക്ഷിതത്വവും പരിഗണിച്ച് ധാരാളം സന്ദര്‍ശകര്‍ തങ്ങളുടെ ഈദുല്‍ അദ്ഹ അവധിദിനങ്ങള്‍ ഇവിടെ ചെലവിഴിക്കാനെത്തുമെന്നാണ് കരുതുന്നതെന്ന് ഖത്തര്‍-ഇന്തോനേഷ്യ ബിസിനസ് കൗണ്‍സില്‍ പ്രസിഡന്റ് ഫര്‍ഹാന്‍ അല്‍ സയ്യിദ് അഭിപ്രായപ്പെട്ടു.
ഖത്തറിന്റെ ആതിഥ്യമര്യാദയും കൊവിഡ് ക്വാറന്റയിനിലെ ഇളവുകളും മറ്റും സന്ദര്‍ശകരെ ഇവിടേക്ക് ആകര്‍ഷിക്കുകയാണ്. സഊദി ഉള്‍പ്പെടെയുള്ള രാജ്യങ്ങളില്‍ നിന്നും നിരവധി പേരെയാണ് പ്രതീക്ഷിക്കുന്നത്. ഖത്തര്‍ ലോകകപ്പ് അടുത്തു വരുന്ന സാഹചര്യത്തില്‍ രാജ്യത്തെ ടൂറിസം സാധ്യതകള്‍ക്ക് ആക്കം വര്‍ധിച്ചതായും ഫര്‍ഹാന്‍ അല്‍ സയ്യിദ് അഭിപ്രായപ്പെട്ടു. രാജ്യത്തെ വാക്‌സിനേഷന്‍ പദ്ധതി വന്‍ വിജയമായതോടെ മാളുകളും മറ്റു കച്ചവടസ്ഥാപനങ്ങളും സന്ദര്‍ശിക്കാന്‍ സന്ദര്‍ശകര്‍ക്ക് സാധിക്കും. സഞ്ചാരികളെ സ്വീകരിക്കാനും അവര്‍ക്കുവേണ്ട സൗകര്യങ്ങള്‍ ഒരുക്കാനുമുള്ള സംവിധാനങ്ങള്‍ പ്രവര്‍ത്തനക്ഷമമായിട്ടുണ്ട്. ഹോട്ടലുകളിലും മറ്റും ആവശ്യമായ സജ്ജീകരണങ്ങളും ഒരുക്കി കാത്തിരിക്കയാണെന്നും അദ്ദേഹം പറഞ്ഞു.
