February 11, 2022
February 11, 2022
ദോഹ : രാക്ഷസൻ, വെണ്ണിലാ കബഡി കുഴു തുടങ്ങിയ ചലച്ചിത്രങ്ങളിലൂടെ ശ്രദ്ധേയനായ വിഷ്ണു വിശാൽ നായകനാവുന്ന 'എഫ്.ഐ.ആറി'ന് ഖത്തറിൽ പ്രദർശനവിലക്ക്. ലോകമെമ്പാടും ഫെബ്രുവരി 11 ന് പ്രദർശനത്തിനെത്തുന്ന ചിത്രത്തിന് മലേഷ്യ, കുവൈത്ത് എന്നീ രാജ്യങ്ങളിലും പ്രദർശന അനുമതിയില്ല. ട്വിറ്റർ പോസ്റ്റിലൂടെ വിഷ്ണു തന്നെയാണ് ഈ വിവരം ആരാധകരുമായി പങ്കുവെച്ചത്.
കുവൈത്ത്, മലേഷ്യ എന്നീ രാജ്യങ്ങളിലെ സിനിമാ ആരാധകരോട് ക്ഷമ ചോദിക്കുന്നു എന്നായിരുന്നു വിഷ്ണു വിശാലിന്റെ ട്വീറ്റ്. ഏറെ വൈകാതെ ഈ ലിസ്റ്റിലേക്ക് ഖത്തറിന്റെ പേരും എഡിറ്റ് ചെയ്ത് ചേർക്കപ്പെട്ടു. വിലക്ക് ഏർപ്പെടുത്താനുള്ള കാരണം വ്യക്തമല്ലെങ്കിലും, സിനിമയിൽ ഇസ്ലാം മതത്തെ മോശമായി ചിത്രീകരിക്കപ്പെട്ടിട്ടുണ്ട് എന്നതാണ് കാരണമെന്നാണ് അഭ്യൂഹം. ഇർഫാൻ അഹമ്മദ് എന്ന യുവാവായാണ് ചിത്രത്തിൽ വിഷ്ണു എത്തുന്നത്. തീവ്രവാദി ആണെന്ന സംശയത്താൽ ഇർഫാനെ തേടി അന്വേഷണ ഏജൻസികളെത്തുന്നതാണ് ചിത്രത്തിന്റെ പ്രമേയം. മനു ആനന്ദ് സംവിധാനം നിർവഹിച്ച ചിത്രത്തിൽ മഞ്ജിമ മോഹൻ, റൈസ വിൽസൺ, റെബ മോണിക്ക ജോൺ എന്നീ താരങ്ങളും അണിനിരക്കുന്നുണ്ട്.
