November 13, 2021
November 13, 2021
ദോഹ : ഖത്തറിലെ പ്രധാനവിമാനത്താവളമായ ഹമദ് അന്താരാഷ്ട്ര വിമാനത്താവളത്തിന്റെ നവീകരണപ്രവർത്തികൾ ഷെഡ്യൂൾ ചെയ്തതിലും മുൻപ് തീർക്കാൻ കഴിയുമെന്ന് ഖത്തർ എയർവേയ്‌സ് ചീഫ് എക്സിക്യൂട്ടീവ് അക്ബർ അൽ ബേക്കർ അറിയിച്ചു. അറേബ്യൻ വിമാനക്കമ്പനികളുടെ സംഘടനയായ 'AACO' യുടെ വാർഷികയോഗത്തിൽ സംസാരിക്കവെയാണ് ബേക്കർ ഇക്കാര്യം സൂചിപ്പിച്ചത്.
'നിലവിൽ ഷെഡ്യൂളിനും ഒരുമാസം മുന്നിലായാണ് പ്രവർത്തി പുരോഗമിക്കുന്നത്. 2022 സെപ്റ്റംബർ ആവുമ്പോഴേക്കും നവീകരണം പൂർത്തിയാക്കാൻ കഴിയുമെന്നാണ് കണക്കുകൂട്ടുന്നത്' - ബേക്കർ അറിയിച്ചു. കോവിഡ് പ്രതിസന്ധി കനത്ത ആഘാതം സൃഷ്ടിച്ചെങ്കിലും, കൂട്ടായ പരിശ്രമത്തിലൂടെ ഈ വെല്ലുവിളിയെ മറികടന്ന് മുന്നേറുമെന്നും ബേക്കർ കൂട്ടിച്ചേർത്തു. യാത്രക്കാരുടെ എണ്ണം 20 മില്യണോളം വർധിപ്പിച്ച്, 58 മില്യൺ ശേഷിയിലേക്ക് ഹമദ് വിമാനത്താവളത്തെ ഉയർത്താനാണ് ഖത്തർ അധികൃതർ തീരുമാനിച്ചിരിക്കുന്നത്.
