January 06, 2022
January 06, 2022
ദോഹ : രാജ്യം നിലവിൽ സാക്ഷിയാവുന്നത് കോവിഡിന്റെ മൂന്നാം തരംഗത്തിനാണെന്നും ജാഗ്രതയോടെ, ഒരുമയോടെ നീങ്ങിയാലേ ഈ പ്രതിസന്ധിയെ തരണം ചെയ്യാൻ കഴിയൂ എന്നും ഡോക്ടർ അൽ ഖാൽ. ഹമദ് മെഡിക്കൽ കോർപറേഷനിലെ പകർച്ചവ്യാധി വിഭാഗം മേധാവിയായ ഡോക്ടർ, ഖത്തർ ടീവിയിൽ സംസാരിക്കവെയാണ് ഈ നിരീക്ഷണം നടത്തിയത്.
മൂന്നാം തരംഗം ആരഭിച്ചിട്ടേയുള്ളൂ എന്നും, ഇനിയും ആഴ്ചകളോളം സ്ഥിതി രൂക്ഷമായി തുടർന്നേക്കും എന്നും ഡോക്ടർ മുന്നറിയിപ്പ് നൽകി. കേസുകളുടെ എണ്ണം അനുദിനം വർധിക്കുന്നത് ആശങ്ക ഉളവാക്കുന്നുണ്ടെങ്കിലും, രോഗികൾക്ക് ഗുരുതരമായ ആരോഗ്യപ്രശ്നങ്ങൾ ഉണ്ടാവുന്നില്ല എന്നത് ആശ്വാസകരമാണ് എന്നും ഡോക്ടർ പറഞ്ഞു. ഒമിക്രോണിന്റെ വ്യാപനശേഷി കണക്കിലെടുത്ത്, ബൂസ്റ്റർ ഡോസ് നൽകുന്ന പ്രക്രിയ പരമാവധി വേഗത്തിലാക്കാൻ രാജ്യം ശ്രമിക്കുന്നതായും അൽ ഖാൽ കൂട്ടിച്ചേർത്തു. രോഗലക്ഷണമുള്ളവർ പനി കുറയാനുള്ള മരുന്ന് കഴിക്കണമെന്നും, ധാരാളം പാനീയങ്ങൾ കുടിക്കണമെന്നും ഡോക്ടർ നിർദേശിച്ചു.