February 04, 2022
February 04, 2022
അൻവർ പാലേരി
ദോഹ : ബുധനാഴ്ച്ച രാത്രി ഖത്തറിലെ വുകൈറിൽ താമസ സ്ഥലത്ത് മരിച്ച നിലയിൽ കണ്ടെത്തിയ ഇടുക്കി തൊടുപുഴ സ്വദേശി പറമ്പുകാട്ട് ശങ്കരപ്പിള്ളയുടെ മകൾ അർച്ചന രാകേഷി(40)ന്റെ മൃതദേഹം ഇന്ന് നാട്ടിലേക്ക് കൊണ്ടുപോകും.അസ്വാഭാവിക മരണമായതിനാൽ നടപടി ക്രമങ്ങൾ പൂർത്തിയാക്കാൻ കാലതാമസം നേരിട്ടേക്കുമെന്ന ആശങ്കയുണ്ടായിരുന്നെങ്കിലും ഖത്തർ കെ.എം.സി.സിക്ക് കീഴിലെ അൽ ഇഹ്‌സാൻ മയ്യിത്ത് പരിപാലന കമ്മറ്റി പ്രവർത്തകർ കഠിന പരിശ്രമത്തിലൂടെ വ്യാഴാഴ്ച രാത്രിയോടെ തന്നെ നടപടിക്രമങ്ങൾ പൂർത്തിയാക്കുകയായിരുന്നു.വെള്ളി,ശനി ദിവസങ്ങൾ വാരാന്ത്യ അവധിയായതിനാൽ മൃതദേഹം നാട്ടിലെത്താൻ വൈകുമെന്ന ആശങ്ക ബന്ധുക്കളും പങ്കുവെച്ചിരുന്നു.
അൽ ഇഹ്‌സാൻ മയ്യിത്ത് പരിപാലന കമ്മറ്റി ഭാരവാഹികളായ മെഹബൂബ് നാലകത്ത്,മൻസൂർ അലി എലത്തൂർ , മുയിസ് മുയിപ്പോത്ത് എന്നിവരുടെ നിരന്തരമായ പ്രവർത്തനമാണ് ഒടുവിൽ ഫലം കണ്ടത് .
ഇന്ന് രാത്രി എട്ടു മണിക്ക് ദോഹയിൽ നിന്നും കൊച്ചിയിലേക്കുള്ള എയർ ഇന്ത്യ എക്സ്പ്രസ് വിമാനത്തിലാണ് മൃതദേഹം നാട്ടിലേക്കയക്കുക.ഭർത്താവ് രാകേഷും രണ്ടു മക്കളും മൃതദേഹത്തെ അനുഗമിക്കുന്നുണ്ട്.
ന്യൂസ്‌റൂം വാർത്തകൾ ലഭിക്കാൻ ഈ ലിങ്കിൽ(https://www.facebook.com/groups/Newsroomclub) ക്ലിക്ക് ചെയ്ത് ന്യൂസ്‌റൂം എഫ്.ബി പേജിൽ അംഗമാവുക.വാട്സ്ആപ്പിൽ വാർത്തകൾ ലഭിക്കാൻ 00974 33450597 വാട്സ്ആപ് നമ്പറിൽ സന്ദേശമയക്കുക
