August 28, 2021
August 28, 2021
കാബൂൾ : അഫ്ഗാനിന്റെ നിയന്ത്രണം സ്വന്തമാക്കിയെങ്കിലും പലമേഖലകളിലും വെല്ലുവിളി നേരിടുകയാണ് താലിബാൻ. സാങ്കേതികവിദഗ്ദർ അടങ്ങിയ അമേരിക്കൻ സംഘം ഈ മാസം അവസാനത്തോടെ രാജ്യം വിടാൻ ഒരുങ്ങവേ വിമാനത്താവളങ്ങൾ പ്രവർത്തിപ്പിക്കാൻ ആളുകളില്ലാത്തത് താലിബാനെ വലയ്ക്കുന്നു. ഇതിനായി ഖത്തറിന്റെ സഹായം അഭ്യർത്ഥിച്ചു എന്നാണ് പുറത്തുവരുന്ന റിപ്പോർട്ടുകൾ. അൽജസീറയാണ് വാർത്ത പുറത്തുവിട്ടത്.
നേരത്തെ തുർക്കിയോടും താലിബാൻ ഇതേ ആവശ്യം ഉന്നയിച്ചിരുന്നു. എന്നാൽ, വിമാനത്താവളത്തിൽ പോലും സ്ഫോടനം അരങ്ങേറിയ സാഹചര്യത്തിൽ തുർക്കി ഈ വിഷയത്തിൽ അനുകൂലനിലപാടെടുത്തിട്ടില്ല. തങ്ങളുടെ പൗരന്മാർക്ക് വേണ്ടത്ര സുരക്ഷ ഒരുക്കുമെന്ന് താലിബാൻ വാക്കുതന്നാൽ മാത്രമേ അഫ്ഗാനിലേക്ക് പൗരന്മാരെ അയക്കൂ എന്ന് തുർക്കി വ്യക്തമാക്കി. അന്താരാഷ്ട്രവിമാനത്താവളങ്ങൾ പ്രവർത്തനരഹിതമായാൽ രാജ്യം ഒറ്റപ്പെട്ടു പോയേക്കുമെന്ന ഭയം താലിബാനെ അലട്ടുന്നുണ്ട്.
