November 04, 2021
November 04, 2021
ദോഹ: സുസ്ഥിരവികസനത്തിന്റെ ഭാഗമായി ഖത്തറിലെ എഡ്യൂക്കേഷൻ സിറ്റിയിൽ തയ്യാറാക്കപ്പെട്ട നൂതനയാത്രാ സംവിധാനമാണ് ട്രാം സർവീസ്. എഡ്യൂക്കേഷൻ സിറ്റിയിലെ സ്കൂളുകളെയും യൂണിവേഴ്സിറ്റികളെയും ബന്ധിപ്പിക്കുന്ന ട്രാം സർവീസ് 2019 ൽ ആണ് ആരംഭിച്ചത്. രണ്ടാമത് ഒരു ട്രാം കൂടെ വൈകാതെ നിരത്തിലിറക്കുമെന്ന പ്രഖ്യാപനം നടത്തിയിരിക്കുകയാണ് അധികൃതർ. ഇതോടൊപ്പം യാത്രക്കാർക്കും ട്രാം ഡ്രൈവർമാർക്കുമായി പുതിയ ഒരുപിടി നിർദ്ദേശങ്ങളും മുന്നോട്ടുവെച്ചിട്ടുണ്ട്.
എഡ്യൂക്കേഷൻ സിറ്റിയിലൂടെ യാത്ര ചെയ്യുന്ന കാൽനടയാത്രക്കാർ സൂചനാബോർഡുകളിലെ നിർദ്ദേശങ്ങൾ കൃത്യമായി പാലിക്കണമെന്നും, ട്രാം ലൈൻ മുറിച്ചുകടക്കുമ്പോൾ അതീവ ശ്രദ്ധ വേണമെന്നും അധികൃതർ ഓർമിപ്പിച്ചു. ജംക്ഷനുകളിൽ ട്രാമിനാണ് മുൻഗണന എന്നും, ട്രാം കടന്നുപോയ ശേഷമേ മറ്റ് മോട്ടോർവാഹനങ്ങൾ ട്രാം ലൈൻ മുറിച്ചുകടക്കാവൂ എന്നും അധികൃതർ വ്യക്തമാക്കി. ട്രാം ലൈനുകളിൽ വാഹനം പാർക്ക് ചെയ്യരുതെന്നും അധികൃതർ കൂട്ടിച്ചേർത്തു. സൈക്കിൾ, സ്കൂട്ടർ എന്നീ വാഹനങ്ങൾ ഓടിക്കുന്നവർ ട്രാം ലൈൻ ഉപയോഗിക്കരുത് എന്ന നിർദ്ദേശവും അധികൃതർ മുന്നോട്ടുവെച്ചിട്ടുണ്ട്.