August 24, 2019
August 24, 2019
ദോഹ: വേനലവധി കഴിഞ്ഞ് രാജ്യത്തെ സ്കൂളുകള്‍ നാളെ തുറക്കും. ഐഡിയൽ.എം.ഇ.എസ് ഉൾപെടെയുള്ള എല്ലാ സ്‌കൂളുകളും വേനലവധി കഴിഞ്ഞു നാളെ പ്രവർത്തനം തുടങ്ങും. ഭൂരിപക്ഷം മലയാളി കുടുംബങ്ങളും അവധി കഴിഞ്ഞ് നാട്ടില്‍ നിന്നും തിരിച്ചെത്തി.റോഡിലുണ്ടാകാന്‍ സാധ്യതയുള്ള അഭൂതപൂര്‍വമായ തിരക്ക് പരിഗണിച്ച് മുന്‍കരുതലുകള്‍ എടുത്തതായി ട്രാഫിക് ഡിപ്പാര്‍ട്ട്മെന്റ് അറിയിച്ചു.
സർക്കാർ സ്കൂളുകളില്‍ നാളെ പുതിയ അധ്യയന വര്‍ഷമാണ്‌ ആരഭിക്കുന്നത്. അതേസമയം ഇന്ത്യന്‍ സ്കൂളുകളില്‍ വേനലവധി കഴിഞ്ഞ് ക്ലാസ്സുകള്‍ പുനരാരംഭിക്കുകയാണ്.
"ഗതാഗതക്കുരുക്ക് ഒഴിവാക്കാന്‍ വിപുലമായ പദ്ധതി തയ്യാറാക്കിയിട്ടുണ്ട്. കൂടുതല്‍ സ്കൂളുകള്‍ ഉള്ള സ്ഥലത്ത് കൂടുതല്‍ പോലിസിനെ വിന്യസിക്കും," ട്രാഫിക് പട്രോള്‍ വിഭാഗത്തിലെ ഓഫീസര്‍ ഖാലിദ്‌ അബ്ദുള്ള അല്‍ കുവാരി പറഞ്ഞു.
എല്ലാ വര്‍ഷവും സ്കൂളുകള്‍ തുറക്കുമ്പോള്‍ വലിയ ട്രാഫിക് കുരുക്കാണ്‌ റോഡുകളില്‍ അനുഭവപ്പെടുന്നത്. പലപ്പോഴും കുട്ടികളുമായി സ്കൂളുകളില്‍ വൈകി എത്തുന്ന രക്ഷിതാക്കള്‍ അവരുടെ കാറുകള്‍ പാര്‍ക്കിംഗ് നിരോധിച്ച സ്ഥലങ്ങളില്‍ പാര്‍ക്ക് ചെയ്യുന്നതാണ് ഗതാഗത കുരുക്ക് ഉണ്ടാകാനുള്ള പ്രധാന കാരണം.
