October 19, 2022
October 19, 2022
ന്യൂസ്റൂം ബ്യുറോ
ദോഹ : ഫിഫ ലോകകപ്പ് ചിത്രീകരിക്കുന്നതിന് മാധ്യമപ്രവർത്തകർക്ക് കടുത്ത നിയന്ത്രണമേർപ്പെടുത്തിയതായുള്ള പ്രചാരണം സംഘാടകരായ സുപ്രീം കമ്മറ്റി ഫോർ ഡെലിവറി ആൻഡ് ലെഗസി നിഷേധിച്ചു.കഴിഞ്ഞ ദിവസങ്ങളിൽ ചില പാശ്ചാത്യൻ മാധ്യമങ്ങളാണ് ഇത്തരമൊരു തെറ്റായ വാർത്ത നൽകിയത്.ലോകകപ്പ് ചിത്രീകരിക്കുന്നതിന് ഖത്തർ കർശനമായ വ്യവസ്ഥകൾ ഏർപെടുത്തിയതായുള്ള വാർത്തകളാണ് മാധ്യമങ്ങൾ വ്യാപകമായി പ്രചരിപ്പിക്കുന്നത്.
ലോകത്തെങ്ങുമുള്ള മാധ്യമപ്രവർത്തകർക്ക് ലോകകപ്പ് ചിത്രീകരിക്കുന്നതിനുള്ള അനുമതി നേടുന്നതിനാവശ്യമായ വ്യവസ്ഥകളും നിബന്ധനകളും ഖത്തർ മീഡിയ പോർട്ടലിൽ നേരത്തെതന്നെ പ്രസിദ്ധീകരിച്ചിട്ടുണ്ട്. ഈ ലിങ്ക് വഴി സെപ്റ്റംബർ ആദ്യം മുതൽ തന്നെ നിരവധി മാധ്യമ പ്രതിനിധികൾ അപേക്ഷ നൽകിയതായും സുപ്രീം കമ്മറ്റി ട്വിറ്ററിൽ നൽകിയ പ്രസ്താവനയിൽ വ്യക്തമാക്കി.
ഇത്തരം ചിത്രീകരണങ്ങൾ അനുവദനീയമാണെങ്കിലും ഇതിന് ഉത്തരവാദപ്പെട്ടവരിൽ നിന്നുള്ള അനുമതി ആവശ്യമാണ്. ലോകമെമ്പാടും തുടർന്നുവരുന്ന നടപടിക്രമങ്ങൾ മാത്രമാണ് ഇതെന്നും സുപ്രീം കമ്മറ്റി വ്യക്തമാക്കി.
ഖത്തറിൽ പ്രവർത്തിക്കുന്ന നിരവധി പ്രാദേശിക, അന്തർദേശീയ മാധ്യമ സ്ഥാപനങ്ങൾക്ക് പുറമെ,ആയിരക്കണക്കിന് മാധ്യമപ്രവർത്തകർ ഓരോ വർഷവും ഖത്തറിൽ നിന്ന് യാതൊരു ഇടപെടലും കൂടാതെ തന്നെ സ്വതന്ത്രമായി റിപ്പോർട്ട് ചെയ്യുന്നുണ്ട്.ഈ സാഹചര്യത്തിൽ ഇത് സംബന്ധിച്ച് കൃത്യമായ വാർത്തകൾ തന്നെയാണ് നൽകുന്നതെന്ന് ഉറപ്പുവരുത്താൻ എല്ലാ മാധ്യമസ്ഥാപനങ്ങളോടും സുപ്രീം കമ്മറ്റി ആവശ്യപ്പെട്ടു.
ന്യൂസ്റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/KYKm2u8nQZBBNg2J0Y6mez എന്ന ലിങ്കിൽ ജോയിൻ ചെയ്യുക