January 23, 2022
January 23, 2022
ദോഹ : ദോഹ നഗരത്തിലുൾപ്പെടെ രാജ്യത്തിന്റെ വിവിധ ഭാഗങ്ങളിൽ ഇന്നലെ ശക്തമായ തണുപ്പാണ് അനുഭവപ്പെട്ടത്. വ്യാഴാഴ്ച്ച വൈകുന്നേരം മുതലാണ് അന്തരീക്ഷ താപനില കുറഞ്ഞു തുടങ്ങിയത്. ശീതക്കാറ്റ് വീശുന്നതാണ് തണുപ്പ് വർധിക്കാൻ കാരണമായതെന്ന് കാലാവസ്ഥാ നിരീക്ഷണകേന്ദ്രം അറിയിച്ചു.
ശനിയാഴ്ച്ച ദോഹയിലെയും സമീപപ്രദേശങ്ങളിലെയും അന്തരീക്ഷ താപനില 7 ഡിഗ്രി സെൽഷ്യസിൽ എത്തിയിരുന്നു. പിന്നാലെയാണ് അബുസംറയിൽ പൂജ്യം ഡിഗ്രിയിലും താഴെ തണുപ്പ് രേഖപ്പെടുത്തിയത്. കാലാവസ്ഥാ വകുപ്പിന്റെ കണക്ക് പ്രകാരം ശനിയാഴ്ച്ച രാവിലെ മൈനസ് 2.4 ആണ് അബു സംറയിലെ താപനില. ദുഖാൻ, ഉമ്മുബാബ് തുടങ്ങിയ പ്രദേശങ്ങളിലും ശക്തമായ തണുപ്പാണ് അനുഭവപ്പെടുന്നത്. മേഘപടലങ്ങൾ ഇപ്പോഴും സജീവമായതിനാൽ തണുപ്പ് തുടരുമെന്നും, പകലും ശക്തമായ കാറ്റിന് സാധ്യത ഉണ്ടെന്നും അധികൃതർ മുന്നറിയിപ്പ് നൽകി. കടൽ പ്രക്ഷുബ്ധമാവാനും സാധ്യത ഉണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചിട്ടുണ്ട്.
