November 23, 2021
November 23, 2021
ദോഹ : ഖത്തർ ലോകകപ്പിന്റെ പ്രചരണാർത്ഥം ഒട്ടേറെ രാജ്യങ്ങൾ സന്ദർശിച്ച അലി ബിൻ മുഹമ്മദ്‌ അൽ മാരി അന്തരിച്ചു. അസുഖബാധിതനായി ഹമദ് ഹോസ്പിറ്റലിൽ പ്രവേശിപ്പിച്ചതിന് പിന്നാലെയാണ് മരണം. ഖത്തറിൽ ഏറെ ആരാധകരുള്ള ട്രാവൽ ബ്ലോഗറുടെ മരണത്തിൽ നിരവധി ആളുകളാണ് ദുഃഖം രേഖപ്പെടുത്തിയത്.
തന്റെ രാജ്യം ലോകകപ്പിന് ആതിഥ്യം വഹിക്കുന്നതിൽ ഏറെ സന്തോഷിച്ച അൽ മാരി, ലോകകപ്പിന്റെ പ്രചരണം തന്റെ ദൗത്യമാണെന്ന് വിശ്വസിച്ചിരുന്നു. സഞ്ചരിക്കാൻ ഉദ്ദേശിച്ച രാജ്യങ്ങളുടെ ഭൂപടങ്ങളാൽ അലങ്കരിച്ച തന്റെ കാറിൽ മൂന്ന് ഭൂഖണ്ഡങ്ങളിലൂടെയാണ് മാരി ഇതിനോടകം യാത്ര ചെയ്തത്. പെരുന്നാളിന് പിന്നാലെ, ജൂണിലാണ് മാരി തന്റെ പര്യടനം ആരംഭിച്ചത്. ഇറാൻ, അസർബൈജാൻ, അർമേനിയ, ജോർജിയ, തുർക്കി തുടങ്ങിയ രാജ്യങ്ങളാണ് മാരി ആദ്യം സന്ദർശിച്ചത്. പിന്നാലെ, റഷ്യ, ജർമനി, സ്വീഡൻ സെർബിയ തുടങ്ങിയ പത്തൊൻപതോളം യൂറോപ്യൻ രാജ്യങ്ങളിലും ലോകകപ്പ് സന്ദേശവുമായി മാരി യാത്ര ചെയ്തു. മൊറോക്കോ, ടുണീഷ്യ, ഘാന തുടങ്ങി തുടങ്ങിയ പത്തോളം ആഫ്രിക്കൻ രാജ്യങ്ങളും സന്ദർശിച്ച യാത്രികൻ സൗത്താഫ്രിക്കയിലാണ് തന്റെ യാത്ര അവസാനിപ്പിച്ചത്. പിന്നാലെ ഖത്തറിലേക്ക് മടങ്ങിയ മാരി നിയോഗമെന്നപോലെ ജന്മനാട്ടിൽ വെച്ച് മരണമടയുകയായിരുന്നു.
