June 20, 2021
June 20, 2021
ദോഹ: അടുത്ത വര്‍ഷം ഖത്തറില്‍ നടക്കുന്ന ഫിഫ ലോകകപ്പിനെത്തുന്ന ഫുട്‌ബോള്‍ ആരാധകര്‍ക്ക് ഖത്തര്‍ ദശ ലക്ഷം കൊവിഡ് വാക്‌സിനുകള്‍ നല്‍കും. പ്രധാനമന്ത്രിയും ആഭ്യന്തരമന്ത്രിയുമായ ശൈഖ് ഖാലിദ് ബിന്‍ ഖലീഫ ബിന്‍ അബ്ദുല്‍ അസീസ് അല്‍ഥാനിയാണ് ഇക്കാര്യം പറഞ്ഞത്. ഖത്തറിലെ വാര്‍ത്താമാധ്യമങ്ങളുടെ ചീഫ് എഡിറ്റര്‍മാരുമായി സംസാരിക്കവെയാണ് അദ്ദേഹം ഇക്കാര്യം പങ്കുവച്ചത്. ഖത്തറില്‍ ലോക കപ്പിനുള്ള ഒരുക്കങ്ങളുമായി ബന്ധപ്പെട്ട സംസാരിക്കവെയായിരുന്നു അദ്ദേഹം ഇക്കാര്യം സൂചിപ്പിച്ചത്.
അടുത്ത വര്‍ഷം ഡിസംബറിലാണ് ലോകകപ്പ് നടക്കുന്നത്. ആ സമയത്തേക്ക് ലോകത്തിലെ ജനവിഭാഗങ്ങളില്‍ ഭൂരിഭാഗത്തിനും കൊവിഡ് വാക്‌സിനേഷന്‍ നല്‍കിയിട്ടുണ്ടാവുമെന്ന പ്രതീക്ഷയിലാണ്. എന്നിരുന്നാലും ഖത്തറിലെത്തുന്ന എല്ലാവരും കൊവിഡ് പ്രതിരോധം സ്വീകരിക്കമെന്നത് നിര്‍ബന്ധമായതിനാല്‍ ഇക്കാര്യത്തില്‍ നടപടികള്‍ ഉണ്ടാവുമെന്ന് അദ്ദേഹം പറഞ്ഞു. രാജ്യത്തെ ജനങ്ങളെയും കാണികളെയും ഫുട്‌ബോള്‍ പ്രേമികളുടെയും ആരോഗ്യരക്ഷ മാനിച്ച് പൂര്‍ണമായും വാക്‌സിനേഷന്‍ നടത്താത്തവര്‍ക്ക് വാക്‌സിന്‍ നല്‍കാനുള്ള പദ്ധതികള്‍ ആസൂത്രണം ചെയ്യും. ലോകകപ്പിനായി എത്തുന്ന കാണികളില്‍ ആരെങ്കിലും വാക്‌സിനേഷന്‍ ചെയ്യാത്തവരുണ്ടെങ്കില്‍ അവര്‍ക്കുവേണ്ടി വാക്‌സിനുകള്‍ ലഭ്യമാക്കാന്‍ ഒരു കമ്പനിയുമായി ഇപ്പോള്‍ ചര്‍ച്ച നടത്തുകയാണെന്നും പ്രധാനമന്ത്രി അറിയിച്ചു. ഖത്തറില്‍ ഏറ്റവും ഫലപ്രാപ്തി തെളിയിച്ച ഫൈസര്‍, മെഡോണ് വാക്‌സിനുകളാണ് സ്വീകരിച്ചിട്ടുള്ളത്. രാജ്യത്ത് റിട്ടയര്‍മെന്റ് പെന്‍ഷന്‍ 15,000 റിയാലാക്കാന്‍ അമീറിന്റെ നിര്‍ദേശമുണ്ടെന്നും അദ്ദേഹം പറഞ്ഞു. രാജ്യത്ത് വിദേശ തൊഴിലാളികള്‍ക്കായുള്ള ക്ഷേമ പ്രവര്‍ത്തനങ്ങള്‍ ഏറ്റവും നല്ല നിലയില്‍ രാജ്യം നടപ്പാക്കിയിട്ടുണ്ടെന്നും അദ്ദേഹം സൂചിപ്പിച്ചു.
