April 07, 2022
April 07, 2022
ദോഹ : കോവിഡിന്റെ വരവും, ലോക്ക്ഡൗണുകളും കാരണം മൊബൈൽ ഫോണിലും മറ്റും മുഴുകി ഇരിക്കുന്ന ശീലത്തിലേക്ക് കൂപ്പുകുത്തിയ പുതിയ തലമുറയെ ഊർജ്ജസ്വലരാക്കാനുള്ള മത്സരങ്ങളുമായി ഖത്തർ മ്യൂസിയം. അടുത്തിടെ ഉദ്ഘാടനം ചെയ്യപ്പെട്ട 3-2-1 മ്യൂസിയത്തിൽ കുട്ടികൾക്കായി പ്രത്യേക പരിപാടികൾ ഒരുക്കും. കായികക്ഷമത ആവശ്യമുള്ള രസകരമായ മത്സരങ്ങളാണ് കുട്ടികളെ കാത്തിരിക്കുന്നത്.
ഈ വർഷം മുതൽ എല്ലാ വർഷവും മത്സരങ്ങൾ നടത്തുമെന്നും സംഘാടകർ അറിയിച്ചു. രാജ്യത്തെ ജനങളുടെ ആരോഗ്യം മെച്ചപ്പെടുത്താനും, അവർക്ക് ഫിറ്റ്നസ് നിലനിർത്താനും ഇത്തരം മത്സരങ്ങൾ ഗുണം ചെയ്യുമെന്നും ഖത്തർ മ്യൂസിയം അഭിപ്രായപ്പെട്ടു. ഡിജിറ്റൽ ലോകത്ത് നിന്നും കുട്ടികളെ യാഥാർഥ്യത്തിന്റെ ലോകത്തേക്ക് മടക്കി കൊണ്ടുവരാനുള്ള പരിശ്രമമാണ് ഈ മത്സരങ്ങൾ. ജൂനിയർ, സീനിയർ വിഭാഗങ്ങളിലായി നടത്തുന്ന മത്സരങ്ങളിൽ, വിവിധ തരത്തിലുള്ള പ്രതിസന്ധികൾ നിറഞ്ഞ ട്രാക്കിലൂടെയാണ് വിദ്യാർത്ഥികൾ മുന്നേറേണ്ടത്. ചിലയിടങ്ങളിൽ ഇഴഞ്ഞും, ചില ഇടങ്ങളിൽ തൂങ്ങിയാടിയും, ചിലപ്പോൾ ഏകാഗ്രതയോടെ ശരീരത്തെ ബാലൻസ് ചെയ്തുമാണ് മത്സരാർത്ഥികൾ മുന്നേറേണ്ടത്. ആസ്പയർ പാർക്കിൽ ഏപ്രിൽ എട്ട് മുതൽ മെയ് 2 വരെ ഇതിനായി പ്രത്യേക ക്യാമ്പ് നൽകും. ഏപ്രിൽ 15, മെയ് 6 തിയ്യതികളാണ് മത്സരങ്ങൾ അരങ്ങേറുക.