October 11, 2021
October 11, 2021
ദോഹ : രാജ്യത്തെ വ്യവസായസ്ഥാപനങ്ങൾ നിയമങ്ങൾ പാലിക്കുന്നുണ്ടോ എന്നറിയാൻ മിന്നൽ പരിശോധനകൾ നടത്തുകയാണ് വ്യവസായമന്ത്രാലയം. വിവിധ നിയമങ്ങൾ ലംഘിച്ച 127 കേസുകളാണ് സെപ്റ്റംബർ മാസത്തിൽ മന്ത്രാലയം കണ്ടെത്തിയത്. തെറ്റായ വിലവിവരങ്ങൾ പ്രദർശിപ്പിക്കുക, കാലാവധി കഴിഞ്ഞ ഉത്പന്നങ്ങൾ വില്പനയ്ക്ക് വെക്കുക, ഉപഭോക്താക്കൾക്ക് കൃത്യമായി പണം റീഫണ്ട് ചെയ്യാതിരിക്കുക തുടങ്ങിയ നിരവധി നിയമലംഘനങ്ങളാണ് വിവിധ കടകൾ നടത്തിയത്. ഈ കടകൾക്ക് അയ്യായിരം റിയാൽ മുതൽ മുപ്പതിനായിരം റിയാൽ വരെ പിഴ ചുമത്തിയതായും മന്ത്രാലയം അറിയിച്ചു.
വിലവിവരപ്പട്ടിക പ്രദർശിപ്പിക്കാത്തതിന് രണ്ട് കടകൾക്ക് എതിരെ നടപടി എടുത്തപ്പോൾ, അഞ്ച് സ്ഥാപനങ്ങൾ അറബി ഭാഷയിൽ ബില്ല് നൽകാഞ്ഞതിന് പിഴ ഏറ്റുവാങ്ങി. നറുക്കെടുപ്പുകൾ നടത്തിയപ്പോൾ നിയമങ്ങൾ ലംഘിച്ചതായി കണ്ടെത്തിയ 13 കടകൾക്കും പിഴ ലഭിച്ചു. തെറ്റിദ്ധാരണജനകമായ വിവരണം ഉത്പന്നങ്ങൾക്ക് കീഴിലായി പ്രദർശിപ്പിച്ചതിന് 24 കടകൾക്കെതിരെയാണ് നടപടിയെടുത്തത്. മന്ത്രാലയത്തിന്റെ ടോൾ ഫ്രീ നമ്പറായ 16001 ൽ വിളിച്ച് നിയമലംഘനങ്ങൾ ശ്രദ്ധയിൽ പെടുത്തണമെന്ന് അധികൃതർ ഖത്തർ ജനതയോട് അഭ്യർത്ഥിച്ചു.