February 10, 2022
February 10, 2022
അൻവർ പാലേരി
ദോഹ : ഖത്തറിൽ മരണപ്പെടുന്നവരുടെ മൃതദേഹങ്ങൾ എത്രയും വേഗം നാട്ടിലെത്തിക്കുന്നതിൽ വർഷങ്ങളായി ശ്രദ്ധേയമായ പ്രവർത്തനം നടത്തുന്നവരാണ് കെ.സി.സി.സിക്ക് കീഴിലെ അൽ ഇഹ്‌സാൻ മയ്യിത്ത് പരിപാലന കമ്മറ്റി.വിവിധ കാരണങ്ങളാൽ മരണപ്പെടുന്നവരുടെ നൂറു കണക്കിന് മൃതദേഹങ്ങൾ ഈ കമ്മറ്റിക്ക് കീഴിൽ ഇതുവരെ നാട്ടിലേക്കയച്ചിട്ടുണ്ട്.എന്നാൽ ചില സന്ദർഭങ്ങളിൽ മൃതദേഹങ്ങൾ നാട്ടിലേക്കയക്കുന്നതിൽ നേരിടുന്ന സാങ്കേതിക തടസ്സങ്ങൾ ഒഴിവാക്കാൻ മരിച്ചവരുടെ ബന്ധുക്കളും ജോലി ചെയ്തിരുന്ന സ്ഥാപന അധികൃതരും പ്രത്യേകം ശ്രദ്ധിക്കണമെന്ന് കമ്മറ്റി ഭാരവാഹികൾ ഓർമിപ്പിച്ചു.
മരിച്ചവരുടെ റെസിഡന്റ്‌സ് പെർമിറ്റ് ഓൺലൈൻ വഴി കമ്പനി പി.ആർ.ഒമാർ അപ്പോൾ തന്നെ റദ്ദാക്കുന്നത് നടപടി ക്രമങ്ങൾ സമയബന്ധിതമായി പൂർത്തിയാക്കുന്നതിന് തടസ്സമുണ്ടാക്കുന്നതായി ഇവർ വ്യക്തമാക്കുന്നു.വിസ റദ്ദാക്കുന്നതിന് മുമ്പ് ആരോഗ്യവകുപ്പ്,സി.ഐ.ഡി,ഖത്തറിലെ ഇന്ത്യൻ എംബസി എന്നിവയുമായി ബന്ധപ്പെട്ട് നിരവധി നടപടിക്രമങ്ങൾ പൂർത്തിയാക്കേണ്ടതുണ്ട്.റെസിഡൻസ് പെർമിറ്റ് റദ്ദാക്കുന്നതോടെ ഇതിനെല്ലാം പ്രയാസങ്ങൾ നേരിടും.അതിനാൽ ഇത്തരം നടപടിക്രങ്ങൾ പൂർത്തിയാക്കിയ ശേഷം മാത്രമേ റെസിഡൻസ് പെർമിറ്റ് റദ്ദാക്കാവൂ എന്ന് കമ്മറ്റി ഭാരവാഹികൾ ഓർമിപ്പിച്ചു.അൽ ഇഹ്‌സാൻ മയ്യിത്ത് പരിപാലന കമ്മറ്റി ചെയർമാൻ മഹബൂബ് നാലകത്ത്,ജനറൽ കൺവീനർ ഖാലിദ് (കല്ലു ) എന്നിവർ സമൂഹമാധ്യമങ്ങൾ വഴിയാണ് ഇക്കാര്യം വ്യക്തമാക്കിയത്.മരണപ്പെടുന്നവരുടെ മൃതദേഹങ്ങൾ നാട്ടിലെത്തിക്കുന്നതിനും മറ്റു നടപടിക്രമങ്ങൾക്കുമായി എല്ലാ സഹായങ്ങളും തുടർന്നും ഉണ്ടാവുമെന്നും ഇവർ വ്യക്തമാക്കി.
ന്യൂസ്‌റൂം വാർത്തകൾ ലഭിക്കാൻ ഈ ലിങ്കിൽ(https://www.facebook.com/groups/Newsroomclub) ക്ലിക്ക് ചെയ്ത് ന്യൂസ്‌റൂം എഫ്.ബി പേജിൽ അംഗമാവുക.വാട്സ്ആപ്പിൽ വാർത്തകൾ ലഭിക്കാൻ 00974 33450597 വാട്സ്ആപ് നമ്പറിൽ സന്ദേശമയക്കുക
