November 29, 2021
November 29, 2021
ദോഹ : കൊറോണ വൈറസിന്റെ ഏറ്റവും പുതിയ വകഭേദമായ ഒമിക്രോൺ ഖത്തറിൽ എത്തിയിട്ടില്ലെന്ന് അധികൃതർ. അൽ റയ്യാൻ ടീവിക്ക് നൽകിയ അഭിമുഖത്തിനിടെ പകർച്ചവ്യാധി നിയന്ത്രണ ഡിപ്പാർട്ടമെന്റ് മേധാവി ഡോക്ടർ ഹമദ് അൽ റുമൈഹിയാണ് ഇക്കാര്യം വ്യക്തമാക്കിയത്. 85 ശതമാനത്തിലധികം പേരും വാക്സിനേഷൻ പ്രക്രിയയിൽ പങ്കാളികളായതിനാൽ ഭയപ്പെടേണ്ട സാഹചര്യം ഇല്ലെന്നും റുമൈഹി അറിയിച്ചു.
പത്തോളം രാജ്യങ്ങളിലാണ് ഇതുവരെ ഒമിക്രോൺ വകഭേദം സ്ഥിരീകരിച്ചത്. വരും ദിവസങ്ങളിൽ ഇത് കൂടുതൽ പേരിലേക്ക് പടർന്നേക്കുമെങ്കിലും, ഖത്തറിൽ സ്ഥിതിഗതികൾ നിയന്ത്രണവിധേയമാണ്, റുമൈഹി അഭിപ്രായപ്പെട്ടു. ബൂസ്റ്റർ ഡോസ് നൽകാൻ ആരംഭിച്ചതിനാൽ കോവിഡിന്റെ വേഗം കീഴ്പ്പെടുത്താൻ കഴിയുമെന്ന പ്രത്യാശയും റുമൈഹി പങ്കുവെച്ചു. ഇക്കഴിഞ്ഞ വാരത്തിൽ 35000 ആളുകളാണ് ബൂസ്റ്റർ ഡോസ് സ്വീകരിച്ചത്. വ്യാജപ്രചാരണങ്ങളിൽ വീഴരുതെന്നും, അറിയിപ്പുകൾക്ക് ഔദ്യോഗിക സ്രോതസ്സുകളെ മാത്രമേ ആശ്രയിക്കാവൂ എന്നും ഡോക്ടർ വ്യക്തമാക്കി.
