August 28, 2021
August 28, 2021
ദോഹ : ഖത്തറിൽ കോവിഡ് പ്രതിരോധത്തിലെ മുന്നണിപ്പോരാളികളായ ഡോക്ടർമാർക്കും, ആരോഗ്യപ്രവർത്തകർക്കും ഉണ്ടായിരുന്ന വാർഷിക ശമ്പളവർദ്ധനവ് നിർത്തലാക്കി. ഹമദ് മെഡിക്കൽ കോർപറേഷന്റെ പോളിസി പ്രകാരം ഇവർക്ക് ഓരോ വർഷവും വേതനത്തിൽ വർദ്ധനവ് വരുത്താറുണ്ടായിരുന്നു. ഇതാണ് പിൻവലിച്ചത്.അതേസമയം, പുതിയ തീരുമാനത്തിനെതിരെ പല കോണിൽ നിന്നും പ്രതിഷേധം ഉയരുന്നുണ്ട്.പ്രാഥമികാരോഗ്യ കേന്ദ്രങ്ങളിലെ ഡോക്ടർമാർക്കും ആരോഗ്യ പ്രവർത്തകർക്കും തീരുമാനം ബാധകമായിരിക്കും.
ഇ-മെയിലിലൂടെയാണ് ശമ്പളപരിഷ്കരണം പിൻവലിച്ച ഉത്തരവ് ഡോക്ടർമാർക്ക് ലഭിച്ചത്. 2021 ഏപ്രിൽ മുതൽ പുതിയ നിയമം ബാധകമാണെന്നും, ഏപ്രിൽ മുതൽ ലഭിച്ചിരുന്ന അധിക തുക തിരിച്ച് ഈടാക്കുമെന്നും മെയിലിൽ പറയുന്നു. ഇതോടെ കേവലം 800 റിയാലിന്റെ വർദ്ധനവ് മാത്രമാണ് ഡോക്ടർമാർക്ക് ലഭിക്കുക. കോവിഡ് കാലത്തെ അധികസമ്മർദ്ദം കൂടി കണക്കിലെടുത്ത് ഉത്തരവ് പിൻവലിക്കണമെന്ന് ആരോഗ്യമന്ത്രാലയത്തോട് അപേക്ഷിക്കാൻ ഒരുങ്ങുകയാണ് ഡോക്ടർമാറം മറ്റു ജീവനക്കാരും.
ഇതാദ്യമായല്ല,ആരോഗ്യമേഖലയിൽ അധികൃതർ മുന്നറിയിപ്പില്ലാതെ പുതിയ നിയമങ്ങൾ അടിച്ചേൽപ്പിക്കുന്നത്. ഈ വർഷം മാർച്ചിൽ ജോലിസമയം ദീർഘിപ്പിച്ചതും മുൻകൂട്ടി അറിയിക്കാതെയായിരുന്നു. തങ്ങളുടെ തൊഴിൽരംഗത്തെ വെല്ലുവിളികൾ ചൂണ്ടികാണിച്ചുകൊണ്ട് എണ്ണൂറോളം പേർ ഒപ്പിട്ട പരാതി അധികൃതർക്ക് നൽകാൻ ഒരുങ്ങുകയാണ് ഡോക്ടർമാർ.