November 25, 2021
November 25, 2021
ദോഹ : അനുമതി ഇല്ലാതെ വീഡിയോ ഷൂട്ട് ചെയ്യാൻ ശ്രമിച്ച രണ്ട് നോർവീജിയൻ പത്രപ്രവർത്തകർക്കെതിരെ ഖത്തർ നടപടി എടുത്തു. ഹാൾവർ എക്ലാൻഡ് എന്ന മാധ്യമപ്രവർത്തകനും, ലോക്ക്മാൻ ഗോർബാനി എന്ന ക്യാമറാമാനും ആണ് അറസ്റ്റിലായത്. 30 മണിക്കൂറിന് ശേഷം ഇവരെ വിട്ടയച്ച അധികൃതർ, ഇവർ ഷൂട്ട് ചെയ്ത വീഡിയോ ഡിലീറ്റ് ചെയ്യുകയും ചെയ്തു.
തന്റെ ഉടമസ്ഥതയിൽ ഉള്ള ഭൂമിയിലേക്ക് രണ്ട് പേർ കടന്നുകയറിയതായി ഒരാൾ പരാതിപ്പെട്ടതിനെ തുടർന്നാണ് ഇവരെ അറസ്റ്റ് ചെയ്തതെന്ന് അധികൃതർ അറിയിച്ചു. ഖത്തറിലെ നിയമം പ്രകാരം ഷൂട്ടിങ്ങിന് മുൻ‌കൂർ അനുമതി വേണം. അനുമതിക്കായി ഈ പത്രപ്രവർത്തകർ അപേക്ഷ സമർപ്പിച്ചിരുന്നെങ്കിലും അനുമതി ലഭിച്ചില്ല. പിന്നാലെ ഇവർ കടന്നുകയറുകയായിരുന്നുവെന്ന് അധികൃതർ വിശദീകരിച്ചു. അതേസമയം, അറസ്റ്റ് ചെയ്ത നടപടി ശെരിയായില്ലെന്ന പ്രതികരണവുമായി നോർവേ പ്രധാനമന്ത്രി ജോനാസ് ഗാർ രംഗത്തെത്തി. അറസ്റ്റ് നടപടികൾക്ക് പിന്നാലെ ഇരുവരും നോർവേയിലേക്ക് മടങ്ങിയതായി പ്രാദേശികമാധ്യമങ്ങൾ റിപ്പോർട്ട് ചെയ്തു. ലേബർ ക്യാമ്പിലെ ദൃശ്യങ്ങൾ ആണ് ഇവർ പകർത്താൻ ശ്രമിച്ചതെന്നും സ്ഥിരീകരിക്കാത്ത റിപ്പോർട്ടുകളുണ്ട്.
