January 30, 2022
January 30, 2022
ദോഹ : കോവിഡ് പ്രതിരോധ വാക്സിൻ നിർമ്മാതാക്കളായ ഫൈസറിന്റെ, അഞ്ച് മുതൽ പതിനൊന്ന് വയസുവരെ പ്രായമുള്ള കുട്ടികൾക്കുള്ള വാക്സിന് ഖത്തർ ആരോഗ്യമന്ത്രാലയം അംഗീകാരം നൽകി. ലോകരാജ്യങ്ങൾ കുട്ടികൾക്ക് വാക്സിൻ നൽകാൻ ആരംഭിച്ചതും, ഫൈസർ വാക്സിന്റെ പ്രവർത്തനക്ഷമത ലാബുകളിൽ പരിശോധിച്ച് തെളിഞ്ഞതും കണക്കിലെടുത്താണ് ഈ തീരുമാനം. മുതിർന്നവർക്ക് നൽകുന്ന വാക്സിൻ ഡോസിന്റെ മൂന്നിലൊന്ന് ഡോസുള്ള വാക്സിനാണ് കുട്ടികൾക്ക് നൽകുക.
കോവിഡിനെതിരെ പ്രതിരോധശക്തി കൈവരിക്കാൻ കുട്ടികളെ സഹായിക്കാനാണ് ഈ നടപടിയെന്നും, ഇതൊരു നിർണ്ണായക തീരുമാനം ആണെന്നും മന്ത്രാലയം പത്രക്കുറിപ്പിലൂടെ അറിയിച്ചു. മുതിർന്നവരുമായി താരതമ്യം ചെയ്യുമ്പോൾ കുട്ടികൾക്ക് കോവിഡ് പിടിപെടാനുള്ള സാധ്യത കുറവാണെങ്കിലും, ഒമിക്രോൺ അടക്കമുള്ള മൂന്നാം തരംഗം കുട്ടികളെയും ബാധിക്കുന്നത് കണക്കിലെടുത്താണ് നടപടി. കുട്ടികൾക്ക് ആദ്യ ഡോസ് നൽകി മൂന്ന് ആഴ്ചകൾക്ക് ശേഷം രണ്ടാം ഡോസ് നൽകാനാണ് ഫൈസർ തയ്യാറെടുക്കുന്നത്. ഇന്ന് മുതൽ ഖത്തറിലെ ഹെൽത്ത് സെന്ററുകളിൽ കുട്ടികൾക്കുള്ള വാക്സിൻ ലഭിച്ചു തുടങ്ങും. രക്ഷിതാക്കൾക്ക് സംശയനിവാരണത്തിനായി 4027 7077 എന്ന നമ്പറിൽ ബന്ധപ്പെടാമെന്നും മന്ത്രാലയം കൂട്ടിച്ചേർത്തു.
