December 07, 2021
December 07, 2021
ദോഹ : ഖത്തർ എയർവേയ്സിൽ സ്വദേശികൾക്ക് കൂടുതൽ തൊഴിൽ അവസരങ്ങൾ സൃഷ്ടിക്കാനുള്ള കരാറിൽ തൊഴിൽ മന്ത്രാലയവും എയർവേയ്സ് അധികൃതരും ഒപ്പിട്ടു. തൊഴിൽ മന്ത്രി ഡോ അലി ബിൻ സമൈക്ക് അൽ മർശിയും, എയർവേയ്സ് സിഇഒ അക്ബർ അൽ ബാക്കിറുമാണ് സുപ്രധാനകരാറിൽ ഒപ്പുവെച്ചത്. സ്വദേശികളുടെ റിക്രൂട്ട്മെന്റുമായി ബന്ധപ്പെട്ട നടപടികൾ വേഗത്തിലാക്കാൻ എയർവേയ്സിന്റെ കെട്ടിടത്തിൽ മന്ത്രാലയത്തിന്റെ ഓഫീസ് ആരംഭിക്കാനും ധാരണയായി.
സ്വകാര്യമേഖലയിൽ ഘട്ടം ഘട്ടമായി സ്വദേശികൾക്ക് കൂടുതൽ അവസരങ്ങൾ സൃഷ്ട്ടിക്കാനുള്ള നയത്തിന്റെ ഭാഗമായാണ് കരാറിൽ ഒപ്പിട്ടതെന്ന് തൊഴിൽ മന്ത്രി അറിയിച്ചു. എയർവേയ്സിൽ ജോലി ചെയ്യാൻ യോഗ്യരായവരുടെ പട്ടിക തയ്യാറാക്കേണ്ട ചുമതല ഇനി മുതൽ തൊഴിൽ മന്ത്രാലയത്തിനായിരിക്കും. മന്ത്രാലയം കൈമാറുന്ന പട്ടികയിൽ നിന്നും അനുയോജ്യരായവരെ ഖത്തർ എയർവേയ്സ് വിവിധ തസ്തികകളിൽ നിയമിക്കും. ഇവർക്ക് ആവശ്യമായ
പരിശീലനം നൽകുന്നതിന്റെ ചുമതലയും എയർവേയ്സ് തന്നെ നിർവഹിക്കുമെന്നും അധികൃതർ അറിയിച്ചു.