March 28, 2022
March 28, 2022
ദോഹ : പരിശുദ്ധ റമദാനിൽ കൂടുതൽ പട്രോളിംഗ് യൂണിറ്റുകളെ നിരത്തിലിറക്കുമെന്ന് ജനറൽ ട്രാഫിക് ഡയറക്ടറേറ്റ് അറിയിച്ചു. ഗതാഗതക്കുരുക്കുകൾ ഉണ്ടാവുന്നത് തടയാനും, അപകടങ്ങൾ കുറയ്ക്കാനുമാണ് ഈ നീക്കം. ഇഫ്താറിന് മുൻപും, തറാവീഹ് നമസ്കാരത്തിന് ശേഷവും ഗതാഗതക്കുടുക്ക് രൂപപ്പെടാതിരിക്കാൻ കൂടിയാണ് ഈ നടപടിയെന്ന് ഡയറക്ടറേറ്റ് മേധാവി ഫഹദ് ബുഹന്ദി അറിയിച്ചു.
ഖത്തർ റേഡിയോയിലെ പരിപാടിയിൽ സംസാരിക്കവേയാണ് ട്രാഫിക്ക് വിഭാഗത്തിന്റെ റമദാൻ മുന്നൊരുക്കങ്ങൾ ബുഹന്ദി വിശദീകരിച്ചത്. ഇഫ്താറിന് മുൻപായി വീടുകളിലെത്താൻ തിരക്കുകൂട്ടുന്നവർ ട്രാഫിക് നിയമങ്ങൾ പാലിക്കണമെന്നും ബുഹന്ദി കൂട്ടിച്ചേർത്തു. സൈക്ലിങിനായി റോഡുകളിൽ ഇറങ്ങുന്നവരും ഈ സമയങ്ങളിൽ ജാഗ്രത പുലർത്തണം. സ്കൂളുകൾ, റസ്റ്റോറന്റുകൾ, സൂപ്പർമാർക്കറ്റുകൾ തുടങ്ങിയവയുടെ പരിസരങ്ങളിലാണ് പട്രോളിംഗ് ശക്തിപ്പെടുത്തുക.