February 13, 2022
February 13, 2022
ദോഹ : കതാറ പൈതൃകഗ്രാമത്തിന്റെ മുഖമുദ്രകളിൽ ഒന്നായ പീജിയൻ ടവർ ഫെബ്രുവരി 16 ബുധനാഴ്ച്ച പൊളിക്കുമെന്ന് അധികൃതർ അറിയിച്ചു. ആധുനികമായ രീതിയിൽ പുനർനിർമാണം നടത്താൻ വേണ്ടിയാണ് ടവറുകൾ തകർക്കുന്നതെന്ന് കതാറ പൈതൃകഗ്രാമത്തിന്റെ ജനറൽ മാനേജർ ഖാലിദ് അൽ സുലൈതി അറിയിച്ചു.
ബുധനാഴ്ച്ച രാവിലെയാണ് ടവറുകൾ നിലംപതിക്കുക. പടിഞ്ഞാറുഭാഗത്ത്, പള്ളിയോട് ചേർന്ന് മൂന്നും, കിഴക്കുഭാഗത്ത് കടൽത്തീരത്തായി രണ്ട് ടവറുകളുമാണ് കതാറയിൽ സ്ഥിതിചെയ്യുന്നത്. പൈതൃകഗ്രാമത്തിലെ പ്രധാന ആകർഷണങ്ങളിൽ ഒന്നായ പീജിയൻ ടവറുകൾക്ക് ചുറ്റും ദിനേന നിരവധി പേരാണ് ചിത്രങ്ങൾ പകർത്താനായി എത്താറുള്ളത്. അതേസമയം, മുഴുവൻ ടവറുകളും പുനർനിർമിക്കുമോ എന്ന കാര്യത്തിൽ ഇതുവരെ ഔദ്യോഗിക സ്ഥിരീകരണം വന്നിട്ടില്ല.