November 21, 2021
November 21, 2021
ദോഹ: പ്രവാസി സാഹിത്യോത്സവിനോടനുബന്ധിച്ച് കലാലയം സാംസ്‌കാരിക വേദി ഖത്തർ ഏർപ്പെടുത്തിയ കലാലയം പുരസ്കാരം പ്രഖ്യാപിച്ചു. മലയാളം കഥ,കവിത എന്നവയിലാണ് പുരസ്കാരം പ്രഖ്യാപിച്ചത്. കഥാ പുരസ്‌കാരത്തിന് സപ്ന നവാസ് എഴുതിയ 'പഴയ സോഫ' എന്ന കഥയും കവിതാ പുരസ്‌കാരത്തിന് ഷംല ജഅഫർ എഴുതിയ 'കടന്നലുകൾ പെരുകുന്നവിധം' എന്ന കവിതയുമാണ് അർഹത നേടിയത്.
സമകാലിക സമസ്യയോട് ചേർന്ന് നിന്ന് പുതുകാലത്തോട് സംവദിക്കുന്ന സൃഷ്ടികളാണ് മത്സരത്തിന് എത്തിയതെന്ന് ജൂറി അഭിപ്രായപ്പെട്ടു. സാഹിത്യ രംഗത്തെ പ്രമുഖരായ പി കെ പാറക്കടവ്, റഹീം പൊന്നാട് എന്നിവരടങ്ങുന്ന ജൂറികളാണ് വിധി നിർണ്ണയിച്ചത്. കലാലയം പുരസ്കാര ജേതാക്കൾക്കുള്ള ഉപഹാരവും പ്രശസ്തി പത്രവും സമ്മാനിക്കുമെന്ന് സംഘാടകർ അറിയിച്ചു.
