January 27, 2022
January 27, 2022
ദോഹ : ഇന്ത്യൻ എംബസിക്ക് സ്വന്തമായി കെട്ടിടം പണിയാൻ ഭൂമി ലഭിച്ചതായി അംബാസിഡർ ദീപക് മിത്തൽ അറിയിച്ചു. വെസ്റ്റ് ബേയിലാണ് ഖത്തർ ഭരണകൂടം ഇന്ത്യൻ എംബസിക്കായി ഭൂമി നൽകിയത്. റിപ്പബ്ലിക് ദിനവുമായി ബന്ധപ്പെട്ട ആഘോഷപരിപാടിയിൽ സംസാരിക്കവെ ആണ് അംബാസിഡർ ഇക്കാര്യം വെളിപ്പെടുത്തിയത്. ഏറെ സന്തോഷമുണ്ടെന്നും, ഇന്ത്യക്കാർക്ക് സ്വന്തം വീടെന്ന് കരുതാവുന്ന, എല്ലാ സൗകര്യങ്ങളും ഉള്ള ഒരു ഓഫീസ് നിർമിക്കുകയാണ് ലക്ഷ്യമെന്നും അംബാസിഡർ കൂട്ടിച്ചേർത്തു.
പുതിയ കെട്ടിടത്തിന്റെ പണി പൂർത്തിയാക്കാനും, ഇന്ത്യ-ഖത്തർ ബന്ധം കൂടുതൽ ഊഷ്മളമാക്കാനും രാജ്യത്തെ മുഴുവൻ ഇന്ത്യക്കാരും ഒറ്റക്കെട്ടായി അണിനിരക്കണമെന്നും മിത്തൽ ആവശ്യപ്പെട്ടു. വെസ്റ്റ് ബേയിലെ നയതന്ത്ര എൻക്ലേവിലാണ് എംബസിക്ക് സ്ഥലം നൽകിയിട്ടുള്ളത്. കെട്ടിടത്തിന്റെ രൂപരേഖ തയ്യാറാക്കാനുള്ള നടപടികൾ സ്വീകരിച്ചതായും, കഴിയുന്നത്ര വേഗത്തിൽ പണി പൂർത്തിയാക്കുമെന്നും മിത്തൽ അറിയിച്ചു. ഖത്തറിലെ ഓരോ ഇന്ത്യക്കാരനിലേക്കും നേരിട്ട് എത്താനായി 'ഇന്ത്യ ഇൻ ഖത്തർ' എന്ന പേരിൽ മൊബൈൽ അപ്ലികേഷൻ പുറത്തിറക്കിയതായും മിത്തൽ അറിയിച്ചു. ഇതുവഴി ഇന്ത്യക്കാർക്ക് 24 മണിക്കൂറും എംബസിയുമായി ബന്ധപ്പെട്ട സേവനങ്ങൾ ലഭിക്കും.
