June 07, 2021
June 07, 2021
ദോഹ : ഖത്തറിൽ ഇന്ന് നടന്ന ലോകകപ്പ്-എ.എഫ്.സി യോഗ്യതാ മത്സരത്തിൽ രണ്ട് ഗോളിന് ഇന്ത്യ ബംഗ്ലാദേശിനെ പരാജയപ്പെടുത്തി.ക്യാപ്റ്റൻ സുനിൽ ഛേത്രിയാണ് ഇന്ത്യക്കായി രണ്ടു ഗോളുകളും അയൽക്കാരായ ബംഗ്ലാദേശിന്റെ വലയിലാക്കിയത്.
എഴുപത്തിയൊമ്പതാം മിനുട്ടിൽ മലയാളി താരം ആഷിഖ് കുരുനിയൻ നൽകിയ പാസിൽ നിന്നാണ് നായകൻ ആദ്യ ഗോൾ നേടിയത്.ഇന്ത്യൻ ആരാധകരെ ആവേശത്തിലാക്കി ഇഞ്ച്വറി ടൈമിലാണ് ഛേത്രി രണ്ടാമത്തെ ഗോളും വലയിലാക്കിയത്.ഇതോടെ ഇപ്പോൾ കളിച്ചുകൊണ്ടിരിക്കുന്നവരിൽ ഏറ്റവും കൂടുതൽ അന്താരാഷ്ട്ര ഗോളുകൾ നേടുന്ന കളിക്കാരിൽ ഇന്ത്യൻ നായകൻ രണ്ടാമതെത്തി.
ലോകകപ്പ് യോഗ്യതാ പ്രതീക്ഷകൾ നേരത്തെ തന്നെ അവസാനിച്ചിരുന്നെങ്കിലും ഈ വിജയത്തോടെ ഏഷ്യൻ കപ്പ് യോഗ്യതാ പ്രതീക്ഷകൾ സജീവമാക്കി നിലനിർത്താൻ ഇന്ത്യക്കായി.ഈ മാസം 15 ന് അഫ്ഗാനിസ്ഥാനെതിരെയാണ് ഇന്ത്യയുടെ അവസാന മത്സരം. കഴിഞ്ഞ മത്സരത്തിൽ ഇന്ത്യ ഒരു ഗോളിന് ഖത്തറിനോട് പരാജയപ്പെട്ടിരുന്നു.
