April 08, 2022
April 08, 2022
ദോഹ : ഖത്തറിൽ നിന്നും ഉംറ തീർത്ഥാടനം നടത്താനായി സൗദി അറേബ്യയിലേക്ക് യാത്ര ചെയ്യുന്നവരുടെ എണ്ണം വർധിച്ചതായി കണക്കുകൾ. കോവിഡ് കേസുകൾ കുറഞ്ഞതോടെ സൗദി, യാത്രാ മാനദണ്ഡങ്ങൾ ലഘൂകരിച്ചിരുന്നു. ഇതോടെയാണ് ഉംറയ്‌ക്കായി സൗദിയിലേക്ക് പോവുന്നവരുടെ എണ്ണത്തിൽ ഗണ്യമായ വർധനവ് രേഖപ്പെടുത്തിയത്. കോവിഡിന് മുൻപുണ്ടായിരുന്ന സാഹചര്യത്തിലേക്ക് ഉംറ തീർത്ഥാടനം തിരികെയെത്തുന്നതിന്റെ ശുഭസൂചനകളാണ് ലഭിക്കുന്നത്.
നിലവിൽ ഉംറയ്‌ക്കായി സൗദിയിൽ എത്തുന്നവർ കോവിഡ് വാക്സിനേഷൻ സർട്ടിഫിക്കറ്റ് ഹാജരാക്കേണ്ടതില്ല. ഒപ്പം, പീസീആർ പരിശോധന, ക്വാറന്റൈൻ തുടങ്ങിയ നടപടിക്രമങ്ങളും സൗദിയിൽ ഇല്ല. ഇതോടെയാണ് തീർത്ഥാടകരുടെ ഒഴുക്ക് വർധിച്ചത്. ഖത്തർ എയർവേയ്‌സ് സർവീസുകളുടെ എണ്ണം വർധിപ്പിച്ചതും ഉംറ തീർത്ഥാടകരുടെ എണ്ണം വർധിക്കാൻ കാരണമായതായി വിദഗ്ദർ ചൂണ്ടിക്കാണിക്കുന്നു. അതേസമയം, ആളുകൾ കൂടുന്നതിനാൽ മക്കയിലെ ഹോട്ടലുകൾ അടക്കമുള്ള താമസസൗകര്യങ്ങൾ അതിവേഗം നിറയുന്ന സാഹചര്യവും നിലവിലുണ്ട്.
