March 03, 2022
March 03, 2022
ദോഹ : ഖത്തറിൽ അനുദിനം റിപ്പോർട്ട് ചെയ്യപ്പെടുന്ന കോവിഡ് കേസുകളിൽ ഗണ്യമായ കുറവ് രേഖപ്പെടുത്തിയതിന് പിന്നാലെ, ഇളവുകളുടെ മൂന്നാം ഘട്ടത്തിലേക്ക് കടക്കുമെന്ന് ഹമദ് കോർപറേഷൻ പ്രഖ്യാപിച്ചു. മാർച്ച് ഒന്ന് മുതൽ 75 ശതമാനം രോഗികൾക്ക് നേരിട്ട് ചികിത്സ തേടാനുള്ള സൗകര്യം ആശുപത്രിയിൽ ഒരുക്കിയിരുന്നു. പുതിയ അറിയിപ്പ് പ്രകാരം മാർച്ച് ആറ് ഞായറാഴ്ച മുതൽ 100 ശതമാനം ശേഷിയോടെയാവും ഹമദ് ആശുപത്രി പ്രവർത്തിക്കുക.
സ്പെഷാലിറ്റി വിഭാഗങ്ങൾ അടക്കമുള്ള മുഴുവൻ ചികിത്സാവിഭാഗങ്ങളും പരമാവധി ശേഷിയോടെ പ്രവർത്തിക്കുമെന്ന സൂചനയാണ് അധികൃതർ നൽകുന്നത്. അതേസമയം, ഓൺലൈൻ ചികിത്സ ആഗ്രഹിക്കുന്നവർക്ക് അതിനുള്ള സൗകര്യം തുടർന്നും ഒരുക്കുമോ എന്ന കാര്യത്തിൽ ഇതുവരെ വ്യക്തതയില്ല. ഇന്നലെ രാജ്യത്ത് മുന്നൂറിൽ താഴെ കോവിഡ് കേസുകൾ മാത്രമാണ് റിപ്പോർട്ട് ചെയ്യപ്പെട്ടത്. 2883 കോവിഡ് രോഗികളാണ് നിലവിൽ ഖത്തറിലുള്ളത്. മികച്ച പ്രതിരോധ മുന്നൊരുക്കങ്ങളും ഉയർന്ന വാക്സിനേഷൻ നിരക്കുമാണ് കോവിഡിനെതിരെ മികച്ച പ്രകടനം കാഴ്ചവെക്കാൻ രാജ്യത്തെ സഹായിച്ചത്.
