December 15, 2021
December 15, 2021
ദോഹ : ഈ വരുന്ന ശനിയാഴ്ച്ച ആഘോഷിക്കപ്പെടുന്ന ഖത്തർ ദേശീയ ദിനത്തിന്റെ പരിപാടികളുടെ കൂടുതൽ വിവരങ്ങൾ അധികൃതർ പുറത്തുവിട്ടു. കോർണിഷിൽ അരങ്ങേറാറുള്ള പ്രത്യേക പരേഡിൽ ഇത്തവണ സൈനികവാഹനവ്യൂഹങ്ങൾ അണിനിരക്കില്ലെന്നും, പകരം, കാലാൾപടയുടെ പ്രത്യേക ദൃശ്യവിരുന്ന് ഒരുക്കുമെന്നും അധികൃതർ അറിയിച്ചു. ഖത്തർ ടീവിക്ക് നൽകിയ പ്രത്യേക അഭിമുഖത്തിൽ മേജർ ജനറൽ സാലിം ബിൻ ഫഹദ് അൽ അഹ്ബാബിയാണ് പരിപാടിയുടെ വിവരങ്ങൾ പങ്കുവെച്ചത്.
ലോകത്തെങ്ങും ഇതുവരെ അരങ്ങേറിയിട്ടില്ലാത്ത പ്രത്യേക പരിപാടികൾ ആണ് അണിയറയിൽ ഒരുങ്ങുന്നതെന്നും, കൂടുതൽ വിവരങ്ങൾ പുറത്തുവിട്ടാൽ ആസ്വാദനഭംഗി കുറഞ്ഞുപോവുമെന്നും മേജർ കൂട്ടിച്ചേർത്തു. പ്രതിരോധമന്ത്രിയുടെ മുൻപാകെ പരേഡ് അവതരിപ്പിച്ച്, അനുമതി വാങ്ങിയ ശേഷമാണ് കാലാൾപടയുടെ പരിപാടികൾ പരേഡിൽ ഉൾകൊള്ളിച്ചതെന്നും അദ്ദേഹം അറിയിച്ചു. കോർണിഷിൽ നിരവധി പരിപാടികൾ ഒരേസമയം അരങ്ങേറുന്നതിനാലാണ് സൈനികവാഹനങ്ങൾ ഇത്തവണ ഒഴിവാക്കിയതെന്നും മേജർ വിശദീകരിച്ചു. റഷ്യയിൽ അടക്കം പരിപാടികൾ അവതരിപ്പിച്ച, പരിചയസമ്പന്നരായ ആളുകളാണ് പരേഡിലെ പരിപാടികളിൽ പങ്കെടുക്കുകയെന്നും സാലിം വ്യക്തമാക്കി.