March 14, 2022
March 14, 2022
ദോഹ : കായികക്ഷമതയ്ക്ക് ഏറെ പ്രാധാന്യമുള്ള മത്സര ഇനമായ അൾട്ടിമേറ്റ് റണ്ണിന്റെ ഖത്തറിലെ ആദ്യ പതിപ്പ് മാർച്ച് 19 ന് അരങ്ങേറും. ഖത്തർ ഒളിമ്പിക് കമ്മിറ്റിയുടെ ആഭിമുഖ്യത്തിൽ കതാറയിൽ നടക്കുന്ന മത്സരത്തിൽ ആകെ മൂന്നരലക്ഷം റിയാലാണ് സമ്മാനത്തുക. 7 വയസ്സ് മുതൽ പ്രായമുള്ളവർക്ക് മത്സരത്തിൽ പങ്കെടുക്കാൻ കഴിയും.
നീന്തൽ, സൈക്ലിങ്, ഓട്ടം തുടങ്ങിയ മൂന്ന് ഇനങ്ങളിലായി നിശ്ചിത ദൂരം ഏറ്റവും കുറഞ്ഞ സമയം കൊണ്ട് താണ്ടുന്നവരാണ് മത്സരത്തിൽ വിജയിയാവുക. 7 വയസ്സ് മുതൽ പതിനഞ്ച് വയസുവരെ ഉള്ളവരുടെ ജൂനിയർ കാറ്റഗറിയിൽ രണ്ട് വിഭാഗത്തിലാണ് മത്സരം നടക്കുക. ഇവർക്ക് നീന്തൽ മത്സര ഇനമായി ഉണ്ടാവില്ല. 7 മുതൽ 11 വയസുവരെ പ്രായമുള്ളവർ ആദ്യം ഒരുകിലോമീറ്റർ ഓടണം. ശേഷം, 2.6 കിലോമീറ്റർ സൈക്ലിങും, അവസാന റൗണ്ടിൽ ഒരു കിലോമീറ്റർ കൂടി ഓടുകയും വേണം. 12 മുതൽ പതിനഞ്ച് വയസുവരെ പ്രായമുള്ളവർക്ക് ഒരു കിലോമീറ്റർ ഓട്ടം, 6.5 കിലോമീറ്റർ സൈക്ലിങ്, 3 കിലോമീറ്റർ ഓട്ടം എന്നിങ്ങനെയാണ് മത്സരഘടന. മുതിർന്നവരുടെ കാറ്റഗറിയിൽ 750 മീറ്റർ നീന്തലും, 20 കിലോമീറ്റർ സൈക്ലിങും, 5 കിലോമീറ്റർ ഓട്ടവുമാണുള്ളത്. മത്സരങ്ങളിൽ മികവ് പുലർത്തുന്നവരെ ഖത്തർ ദേശീയ ടീമിലേക്ക് തിരഞ്ഞെടുക്കുമെന്നും സംഘാടകർ അറിയിച്ചു. മുതിർന്നവർക്ക് 500 റിയാലും, ജൂനിയർ വിഭാഗങ്ങൾക്ക് 75 റിയാലുമാണ് രജിസ്ട്രേഷൻ ചാർജ്. പങ്കെടുക്കാൻ താല്പര്യമുള്ളവർക്ക് http://qqtriseries.com/event/theultimate2022 എന്ന വെബ്സൈറ്റിലൂടെ പേര് രജിസ്റ്റർ ചെയ്യാം.