November 23, 2021
November 23, 2021
ദോഹ : വരും വർഷത്തെ ഫുട്ബോൾ ലോകകപ്പിന് ആതിഥേയരാവാൻ ഒരുങ്ങുന്ന ഖത്തറിനെ പ്രശംസിച്ച് ഫിഫ പ്രസിഡന്റ് ജിയാനി ഇൻഫന്റിനോ. ഖത്തർ ഫൗണ്ടേഷൻ സംഘടിപ്പിച്ച ചടങ്ങിൽ സംസാരിക്കവെയാണ് ഇൻഫന്റിനോ ഖത്തറിനെ വാനോളം പുകഴ്ത്തിയത്. ലോകകപ്പിന്റെ കൗണ്ട് ഡൗണിനോട് അനുബന്ധിച്ച പരിപാടിയിൽ പങ്കെടുക്കാനാണ് ഇൻഫന്റിനോ ഖത്തറിൽ എത്തിയത്.
ഇത്ര ദീർഘവീക്ഷണത്തോടെ ഒരു രാജ്യവും ലോകകപ്പിനെ സമീപിച്ചിട്ടില്ലെന്നാണ് ഇൻഫന്റിനോ അഭിപ്രായപ്പെട്ടത്.അടിസ്ഥാനസൗകര്യങ്ങൾ ഒക്കെയും നേരത്തെ തന്നെ സജ്ജമായതിനാൽ, ഇനിയുള്ള നാളുകളിൽ കാണികൾ ലോകകപ്പിന് എത്തുന്നുണ്ടെന്ന് ഉറപ്പിക്കാനുള്ള പദ്ധതികളിൽ ഖത്തറിന് ശ്രദ്ധ കേന്ദ്രീകരിക്കാമെന്നും ഇൻഫന്റിനോ കൂട്ടിച്ചേർത്തു. അറബ് ലോകത്തിന് കാല്പന്തിന് വലിയ സ്വീകാര്യതയുണ്ടെന്നും, ആതിഥേയരാവാൻ അറബ് മേഖലയ്ക്ക് പരിപൂർണ യോഗ്യതയുണ്ടെന്നും പ്രസിഡന്റ് നിരീക്ഷിച്ചു. ഭിന്നശേഷിക്കാരായ യുവതീയുവാക്കൾക്ക് കായികലോകത്ത് അവസരങ്ങൾ ഒരുക്കാനുള്ള പ്രത്യേകപദ്ധതിയും ചടങ്ങിൽ ഉദ്ഘാടനം ചെയ്യപ്പെട്ടു. ഇതിനായി 'ഫുട്ബോൾ ഫോർ സ്കൂൾസ്' എന്ന പേരിൽ അപ്ലികേഷനും രൂപകൽപന ചെയ്തിട്ടുണ്ട്.
