February 14, 2022
February 14, 2022
ദോഹ : ഖത്തറിലെ ഇഹ്തിറാസ് മൊബൈൽ അപ്ലിക്കേഷനിൽ മാറ്റങ്ങൾ വരുത്തിയതായി ആരോഗ്യ മന്ത്രാലയം അറിയിച്ചു. ഇനി മുതൽ കോവിഡിൽ നിന്നും മുക്തരായ ആളുകൾക്കായി ആപ്പിൽ പച്ച നിറത്തിലുള്ള പ്രത്യേക ഐക്കൺ ഉണ്ടാവും. ഇവർക്ക്, വാക്സിനെടുത്ത വ്യക്തികൾക്ക് ലഭിക്കുന്ന അതേ ആനുകൂല്യങ്ങൾ ലഭിക്കും. രണ്ടാം ഡോസ് വാക്സിൻ സ്വീകരിച്ച് ഒൻപത് മാസം പിന്നിട്ടവർ ബൂസ്റ്റർ ഡോസ് സ്വീകരിച്ചില്ലെങ്കിൽ ആപ്പിലെ ഗോൾഡൻ ഫ്രെയിം മാഞ്ഞുപോവുമെന്നും അധികൃതർ ഓർമിപ്പിച്ചു.
കഴിഞ്ഞ ഒൻപത് മാസങ്ങൾക്കിടെ കോവിഡിൽ നിന്നും മുക്തരായവർക്കാണ് ആപ്പിൽ പ്രത്യേക ഐക്കൺ ലഭ്യമാവുക. ഔദ്യോഗിക അംഗീകാരമുള്ള കോവിഡ് നെഗറ്റീവ് സർട്ടിഫിക്കറ്റ് സമർപ്പിച്ചാലാണ് 'റിക്കവറി ഐക്കൺ 'ലഭിക്കുക. സ്വയം നടത്തുന്ന റാപിഡ് ആന്റിജൻ പരിശോധനയുടെ ഫലം ഹാജരാക്കിയാൽ 'റിക്കവറി ഐക്കൺ' ലഭിക്കില്ല. ഇഹ്തിറാസിലെ ഗോൾഡൻ ഫ്രെയിമിന് കോവിഡിൽ നിന്ന് രോഗമുക്തി നേടുന്നതുമായി ബന്ധമില്ലെന്നും അധികൃതർ കൂട്ടിച്ചേർത്തു. ആപ്പ് സ്റ്റോറിൽ പ്രവേശിച്ച് ഓരോരുത്തരും ഇഹ്തിറാസ് ആപ്പ് അപ്ഡേറ്റ് ചെയ്യണമെന്നും ആരോഗ്യമന്ത്രാലയം അഭ്യർത്ഥിച്ചു.