January 18, 2022
January 18, 2022
ദോഹ : മുപ്പത്തി ഒന്നാമത് ദോഹ പുസ്തകമേളയിൽ ഇന്ന് മുതൽ, മേള അവസാനിക്കുന്ന ദിവസം വരെ കുട്ടികൾക്കും പ്രവേശനം നൽകുമെന്ന് സംഘാടകർ അറിയിച്ചു. നേരത്തെ, കോവിഡ് സാഹചര്യം കണക്കിലെടുത്ത് കുട്ടികളെ മേളയിൽ പ്രവേശിപ്പിക്കില്ല എന്ന് തീരുമാനിച്ചിരുന്നു. സുരക്ഷാ മുൻകരുതലുകൾ പാലിച്ചുകൊണ്ടെത്തുന്ന കുട്ടികൾക്ക് വൈകീട്ട് നാല് മണി മുതൽ രാത്രി ഒൻപത് മണി വരെ മേള ആസ്വദിക്കാം.
മേളയിൽ ഒരേ സമയം പ്രവേശിക്കാവുന്ന കുട്ടികളുടെ എണ്ണത്തിൽ നിയന്ത്രണങ്ങളുണ്ട്. പരമാവധി ശേഷിയുടെ 15 ശതമാനം കുട്ടികൾക്കാണ് മേളയിൽ ഒരേ സമയം സന്ദർശനം നടത്താൻ കഴിയുക. പരമാവധി ശേഷി 2000 ആയതിനാൽ മുന്നൂറ് കുട്ടികൾക്ക് വരെ ഒരേസമയം മേളയിലെത്താം. കുട്ടികളുടെ കൂടെ രക്ഷിതാക്കളോ അധ്യാപകരോ ഉണ്ടായിരിക്കണമെന്ന നിബന്ധനയും സംഘാടകർ മുന്നോട്ടുവെച്ചിട്ടുണ്ട്. മുൻകൂട്ടി പേര് രജിസ്റ്റർ ചെയ്യുന്നവർക്ക് മാത്രമാണ് പ്രവേശനം അനുവദിക്കുക. പന്ത്രണ്ട് വയസിൽ താഴെയുള്ള കുട്ടികൾക്കും, വാക്സിനേഷൻ പൂർത്തിയാക്കാത്ത കുട്ടികൾക്കും മേള സന്ദർശിക്കാൻ കഴിയില്ല.
