December 29, 2021
December 29, 2021
ദോഹ : രാജ്യത്തിന്റെ ട്രാവൽ ലിസ്റ്റിൽ മാറ്റങ്ങൾ വരുത്തിയതായി ആരോഗ്യമന്ത്രാലയം അറിയിച്ചു. ഓരോ രാജ്യത്തെയും കോവിഡ് സാഹചര്യം കൃത്യമായി വിലയിരുത്തിയ ശേഷമാണ് ലിസ്റ്റിൽ മാറ്റങ്ങൾ വരുത്തിയത്. നിലവിലെ പട്ടിക പ്രകാരം 159 രാജ്യങ്ങളാണ് ഗ്രീൻ ലിസ്റ്റിൽ ഉള്ളത്. നേരത്തെ ഇത് 175 ആയിരുന്നു. 23 രാജ്യങ്ങൾ ഉൾപ്പെട്ടിരുന്ന റെഡ് ലിസ്റ്റിൽ ഇപ്പോൾ 47 രാജ്യങ്ങൾ ഉണ്ട്. അതിതീവ്രവ്യാപനമുള്ള എക്സെപ്ഷണൽ റെഡ് ലിസ്റ്റിൽ ഒൻപത് രാജ്യങ്ങളാണ് ഉൾപെട്ടിട്ടുള്ളത്.
സൗദി, യുഎഇ, ലെബനൻ, ജോർദാൻ കെനിയ തുടങ്ങിയ രാജ്യങ്ങൾ റെഡ് ലിസ്റ്റിൽ ആണ് ഉൾപ്പെട്ടിരിക്കുന്നത്. ഇതുസംബന്ധിച്ച് നേരത്തെ ആശയക്കുഴപ്പങ്ങൾ ഉടലെടുത്തിരുന്നു. സൗദിയടക്കമുള്ള രാജ്യങ്ങളെ റെഡ് ലിസ്റ്റിൽ ഉൾപെടുത്തിയതായി ഖത്തർ എയർവേയ്സ് പ്രഖ്യാപിക്കുകയും, പിന്നീട് പ്രഖ്യാപനം പിൻവലിക്കുകയും ചെയ്തിരുന്നു. ഫിലിപൈൻസിനെ കടുത്ത നിയന്ത്രണങ്ങളുള്ള അതിതീവ്രപട്ടികയിൽ നിന്നും റെഡ് ലിസ്റ്റിലേക്ക് മാറ്റിയിട്ടുണ്ട്. ജനുവരി ഒന്ന് വൈകീട്ട് 7 മണി മുതലാണ് പുതിയ ലിസ്റ്റ് പ്രാബല്യത്തിൽ വരിക. ഇന്ത്യ, ബംഗ്ലാദേശ്, ഈജിപ്ത്, നേപ്പാൾ, പാകിസ്ഥാൻ, ബോട്സ്വാന, ലെസോത്തോ, നമീബിയ, സിംബാംബ്‌വേ എന്നിവയാണ് എക്സെപ്ഷണൽ റെഡ് ലിസ്റ്റിലുള്ള രാജ്യങ്ങൾ.
