March 22, 2022
March 22, 2022
ദോഹ : മെട്രോ സ്റ്റേഷനുകളിലൊന്നായ അൽ റിഫയുടെ പേരുമാറ്റിയതായി അധികൃതർ അറിയിച്ചു. ഖത്തർ റെയിൽവേ കമ്പനിയും മാൾ ഓഫ് ഖത്തറും ഒപ്പുവെച്ച കരാറിലൂടെയാണ് അൽ റിഫ സ്റ്റേഷന്റെ പേര് 'മാൾ ഓഫ് ഖത്തർ സ്റ്റേഷനാ'ക്കി മാറ്റിയത്. 10 വർഷമാണ് കരാറിന്റെ കാലാവധി. അൽ റയ്യാൻ ഹോട്ടലിൽ നടന്ന പ്രത്യേക ചടങ്ങിലാണ് പേരുമാറ്റം ഔദ്യോഗികമായി പ്രഖ്യാപിച്ചത്.
അടുത്ത പത്ത് വർഷത്തേക്ക്, സ്റ്റേഷനിലെ ബോർഡുകളിലും, സൂചനാബോർഡുകളിലും, ട്രെയിനുകൾക്കുള്ളിലും, സ്ക്രീനുകളിലും പുതിയ പേര് പ്രദർശിപ്പിക്കും. ഖത്തറിലെ പ്രമുഖ മാളുകളിൽ ഒന്നുമായി കരാറിലേർപ്പെടാൻ കഴിഞ്ഞതിൽ അതിയായ സന്തോഷമുണ്ടെന്നാണ് ഖത്തർ റെയിൽ പ്രതിനിധി അജ്ലാൻ ഈദ് അൽ എനാസി പ്രതികരിച്ചത്. വ്യാപാരമേഖലയുമായി ബന്ധം സ്ഥാപിക്കാനുള്ള നീക്കത്തിന്റെ ഭാഗമായാണ് കരാറെന്നും അൽ എനാസി കൂട്ടിച്ചേർത്തു. മെട്രോയുടെ പ്രധാന സ്റ്റേഷനുകളിൽ ഒന്നായ അൽ റിഫ, ലോകകപ്പ് വേദിയായ അഹ്മദ് ബിൻ അലി സ്റ്റേഡിയത്തിന് അടുത്തായാണ് സ്ഥിതി ചെയ്യുന്നത്.