November 16, 2021
November 16, 2021
ദോഹ : രണ്ട് ഡോസ് വാക്സിനേഷൻ നൽകാനുള്ള നടപടികൾ ഏതാണ്ട് പൂർത്തിയായിട്ടും അനുദിനം കോവിഡ് കേസുകൾ ഉണ്ടാവുന്ന സാഹചര്യത്തിൽ, മൂന്നാം ഡോസ് നിർബന്ധമാക്കാൻ ഒരുങ്ങുകയാണ് ഖത്തർ ആരോഗ്യമന്ത്രാലയം. പ്രായഭേദമന്യേ ഏവരും ബൂസ്റ്റർ ഡോസ് സ്വീകരിക്കണം എന്ന നിർദേശത്തിന് പിന്നാലെ, ഇഹ്തിറാസ് ആപ്പിൽ ഇതുസംബന്ധിച്ച കാര്യങ്ങൾ ഉൾപ്പെടുത്തുമെന്നും മന്ത്രാലയം അറിയിച്ചു.
രണ്ട് ഡോസ് വാക്സിൻ സ്വീകരിച്ച് നിശ്ചിതസമയപരിധി കഴിഞ്ഞിട്ടും ബൂസ്റ്റർ ഡോസ് സ്വീകരിക്കാത്ത വ്യക്തികളുടെ ഇഹ്തിറാസ് ആപ്പിൽ നിന്നും ഗോൾഡൻ ഫ്രെയിം നീക്കം ചെയ്യുമെന്ന് അധികൃതർ അറിയിച്ചു. നിലവിൽ ആറുമാസമാണ് രണ്ടാം ഡോസിനും മൂന്നാം ഡോസിനും ഇടയിൽ ആവശ്യമായ ഇടവേള. എട്ടുമാസങ്ങളോളം കാത്തിരുന്ന ശേഷമേ ബൂസ്റ്റർ ഡോസ് എടുക്കേണ്ടതുള്ളൂ എന്ന് ആദ്യം പ്രഖ്യാപിച്ചെങ്കിലും, പ്രതിരോധശേഷി ആറുമാസങ്ങൾക്ക് ശേഷം ദുർബലമാവുന്നുണ്ടെന്ന് പഠനങ്ങളിൽ തെളിഞ്ഞതോടെയാണ് സമയപരിധി ആറുമാസം ആക്കിയത്. ബൂസ്റ്റർ ഡോസ് സ്വീകരിക്കുന്നത് സംബന്ധിച്ചുള്ള സംശയനിവാരണത്തിന് 40277077 എന്ന നമ്പറിൽ ബന്ധപ്പെടാമെന്നും അധികൃതർ അറിയിച്ചു.
