February 12, 2022
February 12, 2022
ദോഹ : ഡി റിംഗ് റോഡിലെ അൽ തദമൻ ഇന്റർസെക്ഷൻ അടിപ്പാത ഗതാഗതത്തിനായി തുറന്നുകൊടുത്തു. പൊതുമരാമത്ത് വകുപ്പായ അഷ്ഗാൽ ആണ് പാതയുടെ നിർമാണം പൂർത്തിയാക്കിയത്. നുഐജ, അൽ ഹിലാൽ ഓൾഡ് എയർപോർട്ട് തുടങ്ങിയ പ്രദേശങ്ങളിലെ ജനങ്ങൾക്ക് പുതിയ പാത ഏറെ ഗുണം ചെയ്യും. ദോഹയേയും ഡി റിംഗ് റോഡിനെയും ബന്ധിപ്പിക്കുന്ന പുതിയ പാത വഴി 70 ശതമാനത്തോളം യാത്രാ സമയം ലാഭിക്കാമെന്നാണ് കണക്കാക്കപ്പെടുന്നത്.
ഫെരീജ് അൽ അലി, നുഐജ, ലുലു തുടങ്ങിയ ഇന്റർസെക്ഷനുമായി ബന്ധപ്പെടുത്തിയാണ് പുതിയ ഇന്റർസെക്ഷൻ നിർമിച്ചിരിക്കുന്നത്. ഇരുവശത്തേക്കും നാല് വരികൾ ഉള്ളതിനാൽ മണിക്കൂറിൽ പതിനാറായിരത്തോളം വാഹനങ്ങൾക്ക് ഈ വഴി സഞ്ചരിക്കാനാകും. മഴവെള്ളത്തിന്റെ സുഗമമായ ഒഴുക്കിന് 3.5 കിലോമീറ്റർ നീളമുള്ള പ്രത്യേക സംവിധാനവും അഷ്ഗാൽ നിർമിച്ചിട്ടുണ്ട്. ഖത്തറിൽ തന്നെ നിർമിച്ച വസ്തുക്കളാണ് റോഡ് നിർമ്മാണത്തിന് കൂടുതലായും ഉപയോഗിച്ചതെന്ന് അഷ്ഗാലിലെ എഞ്ചിനീയറായ യൂസുഫ് അൽ എമദി അറിയിച്ചു.