March 31, 2022
March 31, 2022
ദോഹ : ലോകകപ്പ് ഫുട്ബോളിന്റെ ഗ്രൂപ്പ് ഘട്ട നറുക്കെടുപ്പിന് മണിക്കൂറുകൾ മാത്രം ബാക്കി നിൽക്കെ, 210 അംഗരാജ്യങ്ങളിലെയും പ്രതിനിധികളെ പങ്കെടുപ്പിച്ചുകൊണ്ടുള്ള ഫിഫ ഫുട്ബോൾ കോൺഗ്രസിന് ദോഹയിൽ തുടക്കമായി. സമ്മേളനത്തിന്റെ 72ആം പതിപ്പാണ് ദോഹയിൽ അരങ്ങേറുന്നത്. പരിപാടിയുടെ ഉദ്ഘാടന ചടങ്ങിനെത്തിയ ഖത്തർ പ്രധാനമന്ത്രി ഷെയ്ഖ് ഖാലിദ് ബിൻ ഖലീഫ ബിൻ അബ്ദുൾ അസീസ് അൽ താനിക്ക്, ഫിഫ പ്രസിഡന്റ് ജിയാനി ഇൻഫാന്റിനോ പ്രത്യേക ജേഴ്സി സമ്മാനിച്ചു.
ലോകകപ്പിന് ഖത്തർ വേദിയാവുന്ന വർഷത്തെ സൂചിപ്പിക്കാൻ, 22 എന്ന അക്കമുള്ള ജേഴ്സിയാണ് പ്രധാനമന്ത്രിക്ക് സമ്മാനിച്ചത്. ആഗോള ടൂറിസഭൂപടത്തിൽ, ഖത്തറിനെ പ്രതിഷ്ഠിക്കാൻ പോവുന്ന ലോകകപ്പാണ് നടക്കാനിരിക്കുന്നത് എന്നായിരുന്നു പ്രധാനമന്ത്രിയുടെ പ്രതികരണം. ഖത്തർ സമയം നാളെ വൈകീട്ട് 7 മണിക്കാണ് ലോകകപ്പിന്റെ ഗ്രൂപ്പ് ഘട്ട നറുക്കെടുപ്പ് നടക്കുന്നത്. ഫിഫ കോൺഗ്രസിന് വേദിയാവുന്ന ദോഹ എക്സിബിഷൻ ആൻഡ് കൺവെൻഷൻ സെന്റർ തന്നെയാണ് നറുക്കെടുപ്പിനും വേദിയൊരുക്കുക.