December 28, 2022
December 28, 2022
ന്യൂസ്റൂം ബ്യുറോ
ദോഹ:ഖത്തറിലെ പ്രധാന ഹൈവേകളിൽ വാഹന ഉടമകളിൽ നിന്നും ഫീസ് ഈടാക്കുന്ന ടോൾ സംവിധാനം ഉടൻ നടപ്പിലായേക്കുമെന്ന് റിപ്പോർട്ട്.'അൽ വതൻ'അറബിക് ദിനപത്രമാണ് കഴിഞ്ഞ ദിവസം ഇതുസംബന്ധിച്ച വാർത്ത നൽകിയത്. തിരക്കുള്ള സമയങ്ങളിൽ ട്രാഫിക് നിയന്ത്രിക്കുന്നതിനും ഗതാഗതം ക്രമീകരിക്കുന്നതിന്റേയും ഭാഗമായി പാർക്കിംഗ് ഫീസും ഹൈവേ ചാര്ജും ഉടൻ ഏർപ്പെടുത്താൻ ഖത്തർ ട്രാഫിക് ഡിപ്പാർട്മെന്റ് ആലോചിക്കുന്നതായാണ് റിപ്പോർട്ടിൽ പറയുന്നത്.എന്നാൽ എന്നുമുതൽ ഇത് നടപ്പിലാവുമെന്ന് റിപ്പോർട്ടിൽ വ്യക്തമാക്കിയിട്ടില്ല.നേരത്തെ പ്രഖ്യാപിച്ച പദ്ധതി ഉടൻ നടപ്പിലാക്കാൻ ആലോചിക്കുന്നതായാണ് റിപ്പോർട്ടിൽ വ്യക്തമാക്കുന്നത്.
ഖത്തറിലെ പ്രമുഖ ഹൈവേകളിൽ നേരത്തെ തന്നെ ക്യൂ ഗേറ്റ് എന്ന പേരിലുള്ള ടോൾ ഗേറ്റുകൾ സ്ഥാപിച്ചിരുന്നെങ്കിലും പ്രവർത്തനം തുടങ്ങിയിരുന്നില്ല.സമൂഹമാധ്യമങ്ങളിൽ ഇതുസംബന്ധിച്ച ചർച്ചകൾ സജീവമായിരുന്നെങ്കിലും ടോൾ പിരിവ് ഉടൻ ഉദ്ദേശിക്കുന്നില്ലെന്ന് അന്ന് അധികൃതർ വ്യക്തമാക്കിയിരുന്നു.രാജ്യത്തെ പ്രധാന ഹൈവേകളുടെയെല്ലാം നിർമാണം പൂർത്തിയായ സാഹചര്യത്തിൽ പദ്ധതി ഉടൻ നിലവിൽ വരുമെന്നാണ് സൂചന. നിരവധി സ്ഥലങ്ങളിൽ പാർക്കിംഗ് ഫീസും ഏർപ്പെടുത്തും.പദ്ധതി നടപ്പിലാക്കാൻ ആവശ്യമായ സജ്ജീകരങ്ങളെല്ലാം ഗതാഗത വിഭാഗം നേരത്തെ തന്നെ പൂർത്തിയാക്കിയിരുന്നു. ട്രാഫിക് ഡിപാർട്മെന്റ് നേരത്തെ ചെയ്തിട്ടുണ്ട്.
ദുബായ് അടക്കം നിരവധി പ്രമുഖ നഗരങ്ങൾ ചെയ്ത പോലെ തിരക്കുള്ള സമയത്ത് ചില സുപ്രധാന ഹൈവേകൾ ഉപയോഗിക്കാൻ വാഹനങ്ങൾക്ക് പ്രത്യേകം ഫീസ് ഏർപ്പെടുത്തുകയാണ് ലക്ഷ്യം.
ന്യൂസ്റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/B5cRGSkveuO5fUeQTErqlq എന്ന ലിങ്കിൽ ജോയിൻ ചെയ്യുക.