November 16, 2022
November 16, 2022
അൻവർ പാലേരി
ദോഹ : ഖത്തർ ലോകകപ്പിന് മണിക്കൂറുകൾ മാത്രം ശേഷിക്കെ,അറബ് ലോകത്ത് ആദ്യമായി നടക്കുന്ന 2022 ഫിഫ ലോകകപ്പിന് ഏറെ സവിശേഷതകൾ ഉണ്ട്.അതുകൊണ്ടു തന്നെ ആതിഥേയ രാജ്യത്തിനെതിരെ പരസ്യമായ 'ഇസ്‌ലാമോഫോബിയ' ഉൾപെടെ രൂക്ഷമായ വംശീയ വിദ്വേഷത്തോടെയുള്ള പരാമർശങ്ങൾക്കും വിമർശനങ്ങൾക്കും ഇടയാക്കിയ മറ്റൊരു ലോകകപ്പും ലോകചരിത്രത്തിൽ ഇതുവരെ ഉണ്ടായിട്ടില്ല.എന്നാൽ ഇതിനെയെല്ലാം മറികടക്കുന്ന നിരവധി പ്രത്യേകതകളുമായിട്ടായിരിക്കും നവംബർ 20 ഞായറാഴ്ച ലോകകപ്പിന് ഖത്തറിൽ വിസിൽ മുഴങ്ങുക.
1- അറബ്, മിഡിൽ ഈസ്റ്റേൺ രാജ്യങ്ങളിൽ നടക്കുന്ന ആദ്യ ലോകകപ്പ്.
2-ഭൂവിസ്തൃതിയിൽ ഏറ്റവും ചെറിയ രാജ്യത്ത് നടക്കുന്ന ആദ്യ ലോകകപ്പ്.
3- 11,586 സ്‌ക്വയർ മാത്രം ഭൂവിസ്തൃതിയുള്ള രാജ്യത്ത് ഒരു മണിക്കൂറിൽ യാത്ര ചെയ്തെത്താവുന്ന ദൂരത്തിൽ എട്ട് സ്റ്റേഡിയങ്ങളിലായി നടക്കുന്ന ചരിത്രത്തിലെ ആദ്യ ലോകകപ്പ്.
4- ഫിഫ ലോകകപ്പിന്റെ 92 വർഷത്തെ ചരിത്രത്തിൽ ശൈത്യകാലത്ത് നടക്കുന്ന ആദ്യ ലോകകപ്പ്.
5- 32 ടീമുകൾ പങ്കെടുക്കുന്ന അവസാനത്തെ ഫിഫ ലോകകപ്പ്. കാനഡ, യുണൈറ്റഡ് സ്‌റ്റേറ്റ്‌സ്, മെക്‌സിക്കോ എന്നിവ ചേർന്ന് സംഘടിപ്പിക്കുന്ന 2026 ലെ അടുത്ത ലോകകപ്പിൽ 48 ടീമുകൾ മൽസരിക്കും.
6- മുഴുവൻ സ്റ്റേഡിയങ്ങളും ഒരു മണിക്കൂർ യാത്രാ ദൂരത്തിൽ സ്ഥിതി ചെയ്യുന്നതിനാൽ ആരാധകർക്ക് ഒരു ദിവസം ഏറ്റവും കൂടുതൽ മത്സരങ്ങൾ കാണാൻ അവസരം ലഭിക്കുന്ന ആദ്യ ലോകകപ്പ്.
7- സുസ്ഥിര സ്റ്റേഡിയങ്ങൾക്ക് പുറമെ, എയർകണ്ടീഷൻ ചെയ്തതും പൊളിച്ചു മാറ്റാവുന്നതുമായ സ്റ്റേഡിയങ്ങളുള്ള ആദ്യത്തെ കാർബൺ രഹിത ലോകകപ്പ്.
8- എല്ലാ മുനിസിപ്പാലിറ്റികൾക്കും ലോകാരോഗ്യ സംഘടനയുടെ 'ആരോഗ്യനഗരം' പദവി ലഭിച്ചതിനാൽ ലോകകപ്പിന് ആതിഥേയത്വം വഹിക്കുന്ന ലോകത്തിലെ ആദ്യത്തെ സമ്പൂർണ ആരോഗ്യ രാജ്യം.
9- ഓഫ്‌സൈഡ് വിളികൾ മെച്ചപ്പെടുത്തുന്നതിനുള്ള വേഗമേറിയതും കൃത്യവുമായ സെമി-ഓട്ടോമേറ്റഡ് ഓഫ്‌സൈഡ് ടെക്‌നോളജി (SAOT) ഉപയോഗപ്പെടുത്തും.
10.ലോകകപ്പ് ചരിത്രത്തിൽ ഏറ്റവും കൂടുതൽ ഇന്ത്യക്കാർ കാണികളായി എത്തുന്ന(അവരിൽ ഭൂരിഭാഗവും മലയാളികൾ) ലോകകപ്പ്.വോളണ്ടിയർമാരായും മറ്റു വിവിധ സേവനവിഭാഗങ്ങളിലും ഏറ്റവും കൂടുതൽ ഇന്ത്യക്കാരുടെ പങ്കാളിത്തമുള്ള ചരിത്രത്തിലെ ആദ്യ ലോകകപ്പ്.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/FxcpaKzzbtR4LadT0rnH7K എന്ന ലിങ്കിൽ ജോയിൻ ചെയ്യുക
